Deputetja e Kuvendit të Kosovës nga radhët e Aleancës për Ardhmërinë e Kosovës, Donika Kadaj-Bujupi, pas largimit nga Lëvizja Vetëvendosje ka thënë se është ndier e fyer nga ish-kolegia partiake, Albulena Haxhiu, nga VV, pasi ajo i ka thënë se “është shitur”, duke kaluar në AAK.
“Asnjëherë në karrierë, asnjëherë në jetë, nuk kam replikuar ndaj fyerjeve të bëra ndaj meje”, është shprehur Kadaj-Bujupi, duke iu referuar deklaratës së Haxhiut.
“Unë i respektoj edhe mendimet ndryshe, nuk replikoj asnjëherë ndaj fyerjeve, kështu do të veproj edhe në të ardhmen”, ka theksuar ajo në T7.
Kadaj-Bujupi ka thënë se Haxhiun e konsideron mike. “Kemi kenë mike edhe më herët. Besoj se kështu do të mbetet edhe në të ardhmen”, është shprehur ajo.
Deputetja e AAK’së ka thënë se nuk i është premtuar asgjë për t’u kthyer në partinë e Ramush Haradinajt.
