Grupi Parlamentar i Lëvizjes Vetëvendosjes këtë javë ka proceduar në Kuvendin e Kosovës Projektligjin për shqyrtimin dhe vërtetimin e pasurisë së pajustifikueshme, i njohur si Ligji Antimafia dhe Projektligjin për Peticione.
Aktualisht të dy këto projektligje janë në fazën e përgatitjes së deklaratës financiare dhe atë për përputhshmërinë me legjislacionin e Bashkimit Evropian të cilat përgatiten nga administrata e Kuvendit.
Sipas VV-së këto nisma legjislative synojnë së pari luftimin efektiv të krimit të organizuar, dhe ai për Peticione zgjerimin e të drejtës së qytetarëve për të marrë pjesë aktivisht në vendimmarrje duke zvogëluar arbitraritetin e vendimeve të pakonsultuara apo të shqetësimeve të cilat nuk merren parasysh nga pushteti ekzekutiv dhe ai legjislativ.
Për të dyja këto projektligje VV ka punuar me grupe të gjera profesionistësh si dhe ka organizuar aktiviteteve nëpërmjet të cilave ka konsultuar qëndrimet edhe të organizatave, profesorëve dhe grupeve të qytetarëve.
