Presidenti i Kosovës, Hashim Thaçi ka thënë se Kosova do të kryejë pjesën e vet të obligimit për krijimin e Asociacionit.
Thotë se së shpejti do formohet Ekipi Menaxhues që do të merret me draftimin e statutit për formimin e tij.
Pas takimit me Vuçiqin, Thaçi ka pohuar se pret që marrëveshja gjithëpërfshirëse me Serbinë të arrihet brenda këtij viti.
Në kuadër të darkës në Bruksel, Përfaqësuesja e Lartë e BE’së, Federica Mogherini kërkoi urgjentisht themelimin e Asociacionit dhe hapjen e urës mbi Ibër
“Përfaqësuesja e Lartë theksoi rëndësinë që BE’ja i jep zbatimit të plotë të të gjitha marrëveshjeve të arritura dhe theksoi në veçanti nevojën urgjente për të filluar me themelimin e Asociacionit / Komunitetit të komunave me shumicë serbe, Marrëveshjen e Energjisë, si dhe të përfundojnë punimet për hapjen e Urës mbi Ibër”, thuhet në njoftimin për media.
Ky ishte takimi i parë i këtij niveli për këtë vit.
Të dy presidentët kanë qëndruar paraprakisht në SHBA.
Takimi i fundit ndërmjet tyre është mbajtur më 20 shtator të vitit 2017 në New York, më ndërmjetësimin e zonjës Mogherini, në dritën e zotimeve të bëra në dy takime që u zhvilluan në korrik dhe në fund të muajit gusht në Bruksel, kur ata ishin pajtuar për një fazë të re të bisedimeve ndërmjet të dyja palëve, përtej çështjeve teknike.
