Godet Gecaj: PDK-ja është sinonim i pabesisë në vendin tonë

Aktuale

Godet Gecaj: PDK-ja është sinonim i pabesisë në vendin tonë

Më: 10 maj 2018 Në ora: 11:17
Bajram Gecaj

Zyrtari i LDK-së, Bajram Gecaj në 1 vjetorin e rënies së Qeverisë së udhëhequr nga Isa Mustafa, është shprehur kritik ndaj të gjitha partive që votuan mocionin për rënien e ekzekutivit.

Në një postim në profilin e tij në Facebook, Gecaj ka shkruar se sot një vit u bënë bashkë të gjithë kundër partisë së pakompromis ndaj shtetndërtimit.

Ai më tej ka shkruar se rënia e Qeverisë u iniciua nga NISMA me përgatitje të PDK-së, që sipas tij, partia e Veselit është sinonim i pabesisë në Kosovë.

Ky është postimi i plotë i Gecajt:

Mocioni i cili solli në pushtet QPK II

Sot një vit u bënë bashkë të gjithë kundër partisë së pakompromis ndaj shtetndërtimit. Pra, secila parti në mënyrën e vet dhe me arsyetimet e tyre sipërfaqësore dhe fiktive u ngritën kundër partisë së vetme shtetformuese në këtë vend, Lidhjes Demokratike të Kosovës, për të përmbysur qeverinë më të mirë të cilën ky vend e kishte pasur ndonjëherë. Edhe pse formalisht e iniciuar nga një parti minore parlamentare, NISMA, iniciativa në të vërtetë ishte konspiruar dhe përgatitur kryekëput nga partia tanimë sinonim i pabesisë në vendin tonë, Partia Demokratike e Kosovës. PDK kishte përfunduar se rrumbullaksimi i mandatit të Qeverisë Mustafa do të nxirrte padiskutim LDK-në si partinë e parë në vend dhe do të dërgonte PDK-në për një kohë të gjatë në opozitë. Kjo i kishte futur frikën në palcë kësaj partie, e cila, për të ruajtur pozicionet e tyre të “kapjes” së shtetit, ishte dhe vazhdon të jetë në gjendje të bashkëpunoj edhe me “dreqin” për hir të zvarritjes rreth e përreth pushtetit me çdo kusht dhe në çdo mënyrë. LVV, AAK dhe NISMA edhe ashtu e kishin “kallë” Kosovën flakë për të ardhur në pushtet, andaj nuk hezituan as një minutë t’i bashkohen në këtë aventurë partisë të cilën e kishin kundërshtuar me aq zell dhe për aq shumë vite. Natyrisht që Listës Serbe dhe Aleksandar Vuçiqit gjithashtu i konvenonte ndonjë konstelacion keqbërësish dhe injorantësh, sepse kështu do të mund të shtynin para më lehtë agjendën e tyre shtetshkatërruese ndaj vendit tonë. Atë të cilën e kishim paralajmëruar para mocionit, sot është bërë realitet i hidhur. Ne tani udhëhiqemi nga qeveria më e keqe dhe më e mbrapsht që Kosova ka pasur ndonjëherë, nga qeveria e “komandantëve”, e cila në fakt është vetëm një replikë e stërkequr e Qeverisë së Përkohshme të Kosovës (QPK) së pasluftës, pra është QPK II.

commentFirst article
Sot mund të lexoni Shfletoni kopertinat