Vjosa Osmani: LDK, VV e PSD të bashkohen për rrëzimin e Qeverisë Haradinaj

Aktuale

Vjosa Osmani: LDK, VV e PSD të bashkohen për rrëzimin e Qeverisë Haradinaj

Më: 18 korrik 2018 Në ora: 19:19
Vjosa Osmani

Deputetja e Lidhjes Demokratike të Kosovës (LDK), Vjosa Osmani ka theksuar se duhet një bashkëpunim dhe bashkërendim i angazhimeve të partive opozitare për ta rrëzuar Qeverinë Haradinaj.

Osmani në një intervistë për media vendore ka thënë se Grupi Parlamentar i LDK-së i ka 27 vota të gatshme për ta votuar mocionin për rrëzimin e ekzekutivit aktual, të cilat, sipas saj, janë mbledhur para një muaji.

“Unë mendoj që partitë opozitare në vend që të përplasen për çështje triviale dhe teknike, do të duhej të ulen seriozisht dhe te bashkëpunojnë, madje jo vetëm në çështje te mocionit, por të ndërtojnë një kulturë të bashkëpunimit dhe bashkërendimi edhe për çështje tjera edhe për seanca”, ka shtuar ajo.

Sipas saj, opozita nuk llogarit në votat e Listës Serbe, dhe po tentojnë të ndërtojnë një marrëveshje me partitë shqiptare në opozitë, duke shtuar se “jemi në diskutim edhe me deputetët e pushtetit për t’i bërë numrat”.

“Nëse i bëjmë llogaritë, atëherë e shohim se LDK i ka 27 vota, Lëvizja Vetëvendosje 19 dhe PSD 12, e që i bie se nuk janë të mjaftueshme për ta rrëzuar Qeverinë. Por, presim votat e disa deputetëve të pozitës, të ndihmojnë ta rrëzojmë Qeverinë”, ka shtuar Osmani.

commentFirst article
Sot mund të lexoni Shfletoni kopertinat