Presidenti Hashim Thaçi ka tentuar dje ta futë në kurth Lidhjen Demokratike të Kosovës me qëndrimin e Lutfi Hazirit për shkëmbim territoresh Kosovë - Serbi. Kur është pyetur rreth qëndrimit të kryetarit të Gjilanit Thaçi ka përmendur faktin se Haziri është edhe nënkryetar i LDK-së.
Hashim Thaçi i ka shpeshtuar konferencat për media. Ai po provon t'i bëjë bashkë subjektet politike duke u bërë thirrje që t’i rreshtohen prapa në dialogun Kosovë – Serbi. Rrugës, derisa po provon t’i bindë ato, ai po provon të ndërtojë kurthe siç ishte rasti dje me LDK-në.
Kur është pyetur rreth deklaratës së Lutfi Hazirit për shkëmbim të territoreve ndërmjet Kosovës dhe Serbisë, Thaçi e ka përmendur faktin që Haziri përveç kryetar i Gjilanit është edhe nënkryetar i LDK-së dhe për pasojë ka thënë se qëndrimin e tij do ta analizojë seriozisht.
Me këtë rast, presidenti e ka goditur edhe kryeministrin Ramush Haradinaj, i cili e ka hedhur poshtë këtë qëndrim të Hazirit duke e quajtur shakaxhi.
Ndryshe, zyrtari i LDK-së, Avdullah Hoti, ditë më parë, është distancuar nga qëndrimi i Hazirit duke thënë se ky është qëndrim personal i tij e jo i partisë.