Mërgimtari Shaip Avdyli nga Gjilani tash e një kohë të gjatë jeton në Zvicër, ndërsa pushimet verore zakonisht i kalon këtu në vendlindje.
Edhe këtë vit, pavarësisht rezolutës së miratuar në Kuvend, përmes së cilës parashiheshin lehtësira të kontrolleve nëpër pikat kufitare, për atë dhe familjen e tij nuk ka ndryshuar asgjë.
Ata janë ballafaquar me pritje të gjata në pikën kufitare te “Dheu i Bardhë” derisa u janë nënshtruar të gjitha kontrolleve kufitare.
Por ministri i Punëve të Brendshme, Bejtush Gashi, i cili e ka për obligim zbatimin e kësaj rezolute, thotë se ajo nuk duhet të hyjë fare në funksion.
Kjo pasi që, sipas tij, është Ligji të cilin e zbaton policia kufitare.
Ndryshe nga pika kufitare e “Dheut të Bardhë”, mërgimtarët që po hyjnë në Kosovë përmes pikës kufitare në Merdarë nuk janë kontrolluar fare.
Në muajin korrik, me iniciativë të deputetit të PSD-së Faton Topalli, Kuvendi miratoi rezolutën për moskontrolle të tërësishme për bashkatdhetarët në pikat kufitare, e cila duhet të zbatohet nga 15 korriku deri më 15 shtator.
