Pjesa më ambicioze kalon përtej Lumit Ibër – projekti i Kadri Veselit për “Mitrovicën e Re”

Aktuale

Pjesa më ambicioze kalon përtej Lumit Ibër – projekti i Kadri Veselit për “Mitrovicën e Re”

Më: 11 gusht 2018 Në ora: 20:29
Projekti i Kadri Veselit për “Mitrovicën e Re”

Tema e Dialogut Kosovë-Serbi, ditëve të fundit, ka prodhuar një debat të nxehtë në opinion, pas raportimeve dhe deklarimeve të ndryshme për mundësinë e ndarjes së Kosovës dhe shkëmbimin e territoreve.

Shqetësimi më i madh është ai që Serbia do të tentojë që kufirin ta vendosë në Lumin Ibër.

Por, këto teori duket se nuk ekzistojnë për Kadri Veselin.

Lideri i PDK-së, siç mëson RTK, ka ideuar një plan për investime të mëdha në Mitrovicë – të cilat do të shtrihen në të dyja anët e Lumit Ibër.

Media shkruan se ka siguruar një projekt, i cili quhet “Mitrovica e Re”, dhe që burimet thonë se është i menduar muaj më parë nga Kadri Veseli.

Ky plan parasheh renovimin e tërësishëm të Stadiumit “Adem Jashari”, zgjerimin e parkingut të tij, ndërtimin e një Aqua-Parku përreth kësaj hapësire, si dhe ndërtimin e objekteve kolektive të banimit përreth Liqenit Artificial.

Por, pjesa më ambicioze e këtij plani të ideuar nga Veseli – kalon përtej Lumit Ibër, i cili mund të nxisë reagime nga Serbia.

Në fshatrat Suhodoll, Gushavc dhe Vinarc, përskaj Lumit Ibër, por edhe në thellësi të tyre, parashihet të ndërtohen objekte të larta banimi, nga 3 deri në 7 kate.

Gjithashtu, në këtë hapësirë, pritet të ndërtohen edhe shkolla, terrene sportive dhe qendra mjekësore.

Projekti parasheh edhe rregullimin e shtratit të Lumit Ibër dhe hapësirës për këmbësorë dhe biçikleta.

Në njërën anë, ky projekt shtrihet nga Mitrovica – te Mëhalla e Boshnjakëve e Zveçan, dhe në anën tjetër vazhdon deri në Zupç e Koshtovë.

Në mënyrë që ky plan të realizohet, e gjithë zona duhet të shpallet Zonë për Ndërtim të Lartë.

Ky projekt do të prezantohet nga Partia Demokratike e Kosovës në Kuvendin Komunal të Mitrovicës.

Te enjten, Veseli ka vizituar Stadiumin “Adem Jashari” në Mitrovicë, ku edhe ka prezantuar projektin për renovimin e tërësishëm të tij.

Veseli përsëriti qëndrimin e tij se nuk do të ketë ndarje të Kosovës.

commentFirst article
Sot mund të lexoni Shfletoni kopertinat