Albin Kurti akuza të rënda për Thaçin: Dikur tradhtar, sot një kolaboracionist

Aktuale

Albin Kurti akuza të rënda për Thaçin: Dikur tradhtar, sot një kolaboracionist

Nga: P.R Më: 13 shtator 2018 Në ora: 09:46
Albin Kurti dhe Hashim Thaçi / Foto ilustrim nga "Bota sot"

Lideri i Lëvizjes Vetëvendosje, Albin Kurti, përmes një postimi në facebook, ka hedhur akuza të rënda ndaj presidentit të Republikës së Kosovës, Hashim Thaçi.

Kurti, Thaçin e ka quajtur tradhtar, që tradhtinë ndaj shqiptarëve e ka bërë që moti, ndërsa sot është një kolaboracionist i Serbisë.

“Debakël, gjithsesi. Thaçi nuk ka as kredibilitet dhe as legjitimitet për dialog me Serbinë. Prandaj, nuk është e rastësishme që ai nuk ka as mandat e as platformë. Veçse tradhtinë (ndaj shqiptarëve) e ka bërë moti Thaçi. Sot ai është veçse një kolaboracionist (i Serbisë). Sepse, gjithmonë Beogradi ka dëshiruar që Prishtina ta kërkojë shkëmbimin territorial: asisoj ne heqim dorë nga veriu ndërkohë që ajo s’e jep Preshevën, Medvegjën e Bujanocin”, ka shkruar Kurti, përcjellë “Bota sot”.

Ky është postimi i plotë:

Dikur tradhtar, sot veçse kolaboracionist

“… u ndjeva më i miri, hodha shtat, u zbukurova, thuajse doja fyerje.” – Albert Camus, te novela “Renegati ose një mendjeprishur”

Gjashtë vjet të dialogut të Thaçit me Serbinë: nuk u shpërbënë strukturat paralele të Serbisë, nuk u kthyen të pagjeturit, nuk u kërkua reciprociteti i të drejtave, nuk u përmend diskriminimi në Preshevë, Medvegjë e Bujanoc, nuk u fol për reparacionet e luftës dhe të okupimit, nuk u shtrua sukcesioni nga shpërbërja e Jugosllavisë etj.etj.

Në anën tjetër, si pasojë e dialogut 2011-2017: na u shtua fusnota e na u hoq Republika nga emërtimi, u vunë themelet e ‘Zajednicës’, u amnistuan kriminelët serbë në veri dhe u ndanë etnikisht gjyqësori e policia atje, nuk ka liri të lëvizjes në urën mbi Ibër kurse në veri lëvizin vetura pa targa, u krijua Lista Serbe, u sabotua interkoneksioni energjetik me Shqipërinë, nuk na i kthyen librat kadastralë, na e bllokuan anëtarësimin në UNESCO dhe INTERPOL, i shtuan arrestimet ndaj zyrtarëve tanë shtetërorë etj.etj.

Debakël, gjithsesi. Thaçi nuk ka as kredibilitet dhe as legjitimitet për dialog me Serbinë. Prandaj, nuk është e rastësishme që ai nuk ka as mandat e as platformë. Veçse tradhtinë (ndaj shqiptarëve) e ka bërë moti Thaçi. Sot ai është veçse një kolaboracionist (i Serbisë). Sepse, gjithmonë Beogradi ka dëshiruar që Prishtina ta kërkojë shkëmbimin territorial: asisoj ne heqim dorë nga veriu ndërkohë që ajo s’e jep Preshevën, Medvegjën e Bujanocin.

commentFirst article
Sot mund të lexoni Shfletoni kopertinat