Rusia ka kërkuar leje nga disa shtete amerikane për dërgim të vëzhguesve në zgjedhjet presidenciale dhe legjislative më 8 nëntor, por së paku tri shtete e kanë refuzuar këtë.
Departamenti amerikan i shtetit ka njoftuar mbrëmë vonë se Rusia është e mirëseardhur për observim të zgjedhjeve, por Moska e ka hedhur poshtë ftesën e Shteteve të Bashkuara, që Rusia të përfshihet në ekipin e Organzatës për Siguri dhe Bashkëpunim në Evropë (OSBE), që i monitoron zgjedhjet në Shtetet e Bashkuara dhe në Evropë.
“Ne i thamë qeverisë së Rusisë se ata janë të mirëseardhur për t’i observuar zgjedhjet tona”, tha zëdhënësi i Departamentit amerikan të shtetit, John Kirby, dhe ka shtuar se “ne jemi shumë të sigurt në stabilitetin, sigurinë dhe forcën e procesit tonë zgjedhor dhe nuk ka nevojë për fshehje nga kjo”.
Njëherësh, Ambasada e Rusisë ka kërkuar leje së paku në tri shtete amerikane për dërgimin e monitoruesve në vendvotime, por Okllahoma, Teksasi dhe Luiziana, e kanë hedhur poshtë këtë kërkesë.
