Presidenti i zgjedhur i Shteteve të Bashkuara të Amerikës, Donald Trump ka ftuar Rodrigo Duterte për një vizitë në Shtëpinë e Bardhë gjatë vitit të ardhshëm, deklaroi sot një ndihmës i presidentit filipinas.
“Duterte i telefonoi Trump për ta përgëzuar për fitoren e tij në zgjedhjet presidenciale të nëntorit”, deklaroi Christopher Go, ndihmësi i presidentit filipinas.
Go e përshkroi bisedën mes Duterte dhe Trump si “të frytshme dhe miqësore”.
Sipas tij, biseda telefonike mes tyre zgjati shtatë minuta dhe 20 sekonda.
Duterte e ftoi gjithashtu Trump-in që të marrë pjesë në samitin e vitit të ardhshëm të Shoqatës së Vendeve të Azisë Juglindore, ASEAN, që organizohet nga Filipinet. Presidenti amerikan Barack Obama ka marrë pjesë rregullisht në këtë samit.