Para inaugurimit të tij, tashmë presidenti i 45-të amerikan, Donald Trump, ka kërkuar që të gjithë ambasadorët amerikanë në botë, të emëruar nga Barack Obama, të largohen nga zyrat e tyre në mesditën e 20 janarit.
Ekipi i tij më 23 dhjetor 2016 ka thënë se “nuk do të ketë përjashtime” që ambasadorët të vazhdojnë mandatin, madje as për ata që kanë fëmijë të vegjël.
Është politikë e zakonshme që ambasadorët të japin dorëheqje në fillim të administratës së re. Por, nuk është e zakonshme që të mos ketë zëvendësime për ta kur tërhiqen.
Momentalisht, SHBA-të nuk kanë ambasadorë tek aleatët kryesorë në Evropë, madje as në shtetet si Kina, India, Japonia apo Arabia Saudite.
Gruaja e parë e Trumpit, Ivana, thuhet se ka shprehur interes të jetë ambasadore në vendlindjen e saj, në Çeki. Presidenti çek, Milos Zeman, ka thënë se “nuk mund të ketë ambasador më të mirë të SHBA-ve, se ajo, në Pragë”.
