Presidenti Donald Trump ka vendosur t’i japë fund një programi të Agjencisë Qendrore të Zbulimit për të pajisur dhe trajnuar grupet kryengritëse siriane.
Zyrtarët amerikanë thanë se vendimi u mor rreth një muaj më parë pas një takimi të mbajtur me Këshilltarin e Sigurisë Kombëtare H.R. McMaster dhe Drejtorin e CIA-s, Mike Pompeo.
Programi filloi në vitin 2013 nën ish-Presidentin Barak Obama për të ndihmuar kryengritësit e moderuar në luftën kundër presidentit sirian Bashar al-Assad.
Qysh në fillim pati pikëpyetje rreth efektshmërisë së planit si dhe shqetësime se mos armët e furnizuara nga Shtetet e Bashkuara përfundonin në duart e militantëve.
Zyrtarët thanë se vendimi i zotit Trump është pjesë e përpjekjes së administratës për të përmirësuar marrëdhëniet me Rusinë, e cila lufton në Siri që nga fundi i vitit 2015 në mbështetje të Asadit./voa
