Pas prezantimit zyrtar të modelit XF Sportbrake, dizajnuesit dhe inxhinierët e Jaguar janë të bindur se në këtë moment kanë karavanin më të mirë në segmentin e mesëm, i cili do t’iu ofrohet blerësve evropianë, amerikanë dhe atyre në Kinë. Automobili për blerësit evropianë do të ofrohet në katër opsione dizel dhe një me motor benzinë.
Në ofertën bazë për dizel është motori 2.0 litra me katër cilindra i gjeneratës Ingenium me 163 kuaj fuqi. Konfigurimi 2.0 litra do të ketë katër cilindra me motorë që ofrojnë 180, përkatësisht 240 kuaj fuqi, ndërsa në krye të ofertës është edhe ajo për motorin 3.0 litra V6 me 300 kuaj fuqi.
Tash për tash motori i vetëm benzinë në ofertë është ai 2.0 litra me katër cilindra, i cili me asistencën e turbo-mbushësit ofron 250 kuaj fuqi.
Bartja e fuqisë bëhet përmes ndërruesit automatik prej tetë shpejtësive. Për blerësit amerikanë do të ofrohet edhe motori 3.0 litra V6 që siguron 380 kuaj fuqi.
Blerësit do të mund të zgjedhin një nga pesë pakot e ofruara të pajisjeve Pure, Prestige, Portfolio, R-Sport dhe S, ndërsa çmimi i versionit bazë do të jetë 41.462 euro.
