Irani thotë se Garda Revolucionare Islamike do kryej ushtrime të mëdha ushtarake në pjesën lindore dhe verilindore të republikës islamike.
Gjenerali Mohammad Pakpour, komandant i njësisë tokësore të kësaj garde ka thënë në Teheran sot se ushtrimet “Profeti i Madh 11” do të fillojnë pas dy ditësh dhe do të zgjasin tre ditë.
Pakpour ka thënë se disa raketa, dronët e gardës dhe artileria do të përdoren gjatë këtyre ushtrimeve.
Ushtrimet do të mbahen megjithë paralajmërimet nga Shtetet e Bashkuara dhe mundësinë e vendosjes së sanksioneve të reja nga Uashingtoni pas testimit të një rakete balistike nga Irani më 29 janar.
Pakpour ka thënë se ushtrimet kanë qëllim të demonstrojnë përgatitjen e plotë të Iranit për tu përballur me kërcënime dhe sanksionet turpëruese nga Uashingtoni.
Sekretari amerikan i mbrojtjes, Jim Mattis ka thënë se Irani është sponsori më i madh shtetëror në botë i terrorizmit.