Golden Eagle Ylli nga Theranda ka triumfuar në kryendeshjen e xhiros së XVI në IP Superligën e Kosovës në basketboll kundër Rahovecit që është zhvilluar në palestrën "13 Qershori" në Therandë.
Takimi i luajtur në prani të rreth 2000 tifozëve, ku të pranishëm ishin edhe tifozë të Rahovecit ka përfunduar me rezultat 99:86 (23:14, 17:21, 32:25, 27:26).
Rivaliteti ndërmjet këtyre dy ekipeve ka mbretëruar prej fillimit të ndeshjes e deri në fund, ndonëse në pesë minutat e fundit të çerekut të tretë, vendasit ishin ata që krijuan një avantazh prej 15 pikëve, të cilin arritën ta ruajnë mjaft mirë deri në përmbyllje të takimit, i cili përfundoi me 13 pikë në favor të therandasve.
Më të merituarit për fitoren e Golden Eagle Ylli ishin Arif Mehmetaj me 26 pikë, 8 kërcime e 4 asistime, Artin Gashi me 25 pikë, 10 kërcime e 2 asistime, Michael Harmon me 25 pikë, 3 kërcime e 8 asistime dhe Dragan Sekelija me 13 pikë, 13 kërcime e 4 asistime.
Në anën tjetër te Rahoveci më efikasit ishin Arian Qallaku me 18 pikë e 5 kërcime, Muhamed Hasani me 16 pikë, 4 kërcime e 8 asistime dhe Arti Hajdari me 13 pikë, 3 kërcime e 2 asistime.
Ndërkohë në kuadër të xhiros së XVI të IP Superligës së Kosovës fitore kanë regjistruar edhe Sigal Prishtina në përballje me Pejën (111:85), derisa Trepça ishte skuadër më e mirë se Kerasan Prishtina (88:75) dhe Bashkimi triumfoi në ballafaqim me Borean (97:70).
