Në Pallatin e Rinisë dhe Sporteve në kryeqytet, sot (e shtunë) zhvillohet ndeshja e parë e serisë finale të ‘play-offit’ ndërmjet Sigal Prishtinës dhe Bashkimit në kuadër të IP Superligës së Kosovës në basketboll.
Për t’u kualifikuar në finale, bardhekaltrit në gjysmëfinale eliminuan Golden Eagle Yllin (3-0), kurse prizrenasit u treguan më të fortë se Rahoveci (3-0).
Skuadra nga kryeqyteti është në kërkim të titullit të 12-të që nga paslufta, derisa Bashkimi e dëshiron trofeun e parë.
Ndeshjet finale zhvillohen në sistemin, një ndeshje në Prishtinë, një në Prizren, kurse bardhekaltrit e kanë epërsinë e terrenit vendas në rast se seria shkon deri në pesë ndeshje.
Dueli i parë i serisë finale zhvillohet sot (e shtunë) nga ora 19:00 në kryeqytet, ndërsa ekipi që i fiton tri ndeshje, shpallet kampion.
Përmendim se Sigal Prishtina është kampion në fuqi i Superligës së Kosovës në basketboll.
Po ashtu, kryeqytetasit këtë sezon e kanë fituar edhe Kupën e Kosovës, pas triumfit në finale pikërisht ndaj Bashkimit.
