Aziz Salihu, fitues i medaljes së bronztë olimpike në vitin 1984, i ka mbetur fort hatri në kryetarin e Komunës së Prishtinës, Shpend Ahmeti. Ish-boksieri i mirënjohur nuk ka mundur ta përpijë pse nuk është nderuar me mirënjohjen me rastin e zgjedhjes së sportistëve më të mirë të kryeqytetit. ‘Zizi’ tha se e ka merituar një mirënjohje të paktën si Sportist i Shekullit posaçërisht pas gjithë atyre vuajtjeve dhe sfidave që ka pasur në vitin 2016, dhe falë Zotit është mirë me shëndet, sepse një kohë ka qenë në gjendje kritike dhe i shtrirë për disa muaj fillimisht në spitalin e Prishtinës, pastaj në Stamboll dhe me 14 tetor u kthye në Prishtinë, por me gjendje shumë të mirë ngase vuante nga sëmundja e pankreasit. “Të gjithë e dimë se çfarë kam bërë në kohën e okupimit për sportin e Kosovës dhe pas luftës, dhe sa turne kam organizuar. Jam kryetar i klubit me renome Prishtina dhe më i suksesshmi i të gjitha kohërave. Shpend, pse me harrove? Pse nuk më dha një mirënjohje të paktën që isha i pranishëm në manifestimin e shpalljes së më të mirëve të Prishtinës. E kam merituar. Kryetari i Komunës së Lypjanit, Imri Ahmeti, më ka nderuar me mirënjohje, por nuk kisha mundësi për shkaqe shëndetësore që të udhëtojë në Lypjan”, thotë ‘Zizi’ për gazetën kombëtare “Bota sot”.