Sipas organizatës së të drejtave të njeriut “Human Rights Watch”, policia në Turqi ka shfrytëzuar dekretet e emergjencës të miratuara pas puçit të dështuar të muajit korrik, për të ushtruar torturë.
Raporti i organizatës përshkruan 13 raste torture nga policia, të mundësuara prej dekreteve të emergjencës që heqin përgjegjësinë e zytarëve për veprimet e tyre.
Drejtori për Evropën dhe Azinë Qendrore në “Human Rights Watch”, zoti Hugh Williamson, tha se duke hequr ligjet kundër torturës, qeveria turke u dha realisht dorë të lirë agjensive ligjzbatuese që të torturojnë dhe keqtrajtojnë të ndaluarit.
Presidenti turk Recep Tayyip Erdogan shpalli gjendjen e emergjencës pas puçit të dështuar të muajit korrik. Që atëherë janë arrestuar mbi 30 mijë persona, pjesa më e madhe ushtarakë, arsimtarë dhe juristë.
