Presidenti i Kinës, Xi Jinping, u ka bërë thirrje të gjitha palëve që të përmbahen kur të merren me Korenë Veriore, midis spekulimeve se Veriu shumë shpejt mund ta kryejë edhe testimin e gjashtë raketor.
Mediat shtetërore të Kinës raportojnë se Xi i ka telefonuar presidentit të SHBA-së, Donald Trump, dhe i ka thënë se Kina e kundërshton programin e armëve bërthamore të Veriut.
Transmetuesi shtetëror kinez CCTV e ka cituar Xi duke i thënë Trumpit se shpreson se të gjitha palët do të përmbahen dhe do ta shmangin përkeqësimin e situatës në gadishullin korean.
Administrata Trump ka paralajmëruar se të gjitha opsionet, përfshirë sulmin ushtarak, janë në tavolinë për ta ndalur Korenë e Veriut nga zhvillimi i raketave bërthamore që mund ta arrijnë SHBA-në.
“Sikur të gjitha palët ta mbajnë përgjegjësinë që duhet ta mbajnë dhe të bashkohen, çështja bërthamore në gadishull do të zgjidhet sa më shpejt që të jetë e mundur,” Xi i ka thënë Trumpit, sipas CCTV.