Presidenti i Shteteve të Bashkuara, Donald Trump, tha se SHBA nuk do të lejojë më “abuzime kronike tregtare”.
Trump iu adresua të premten Samitit të Bashkëpuimit Ekonomik Azi-Paqësor, në Vjetnam.
Ai tha se do t’i vërë interesat e Amerikës gjithmonë të parat dhe se vendet e Azi-Paqësorit duhet të ndjekin tregti të ndershme reciproke.
“Nga sot e tutje, ne do të garojmë mbi baza të drejta dhe të barabarta. Nuk do të lejojmë më që të përfitohet nga SHBA-ja. Unë do ta vë Amerikën të parën. Kështu pres edhe nga të gjithë ju të bëni me vendet e juaja”, tha Trump.
Krejt ndryshe nga ai foli presidenti i Kinës, Xi Jinging, i cili tha se globalizmi është i pakthyeshëm dhe shprehu mbështetje për multilateralizmin.
Samiti i Azi-Paqësorit mbledh së bashku 21 ekonomi nga rajoni i Paqësorit – ekuivalente me rreth 60 përqind të bruto prodhimit botëror.
Prejse ka marrë detyrën në janar, Trump ka ndjekur politikën “Amerika e para" dhe e ka tërhequr SHBA-në nga Partneriteti Trans-Paqësor, një marrëveshje e madhe tregtare me 12 vende të Azi-Paqësorit.
Trump ka thënë se kjo marrëveshje i dëmton interesat ekonomikë të SHBA-së.
