Shefja e diplomacisë jugkoreane, Kang Kjung Va, deklaroi se kreu i Koresë Veriore Kim Jong Un "ka dhënë fjalën" se është i përkushtuar për denuklearizim.
Siç thuhet, ky është kushti kryesor i presidentit amerikan Donald Trump për mbajtjen e takimit dypalësh në muajin maj.
Trump ka pranuar ofertën për takimin, i cili, siç vlerësohet, do të jetë historik, pasi që zyrtarët jugkoreanë pas bisedave në Pjog-jang, thanë se Kim Jong Un është i gatshëm të heqë dorë nga armët nukleare dhe të ndërpresë provat nukleare dhe raketore.
Koreja Veriore nuk ka konfirmuar zyrtarisht planin për një samit, dhe nuk është i njohur vendi i takimit.
