Artisti shqiptar, finalist në “Artes Mundi”

Artisti Adrain Paci është duke marrë pjesë në një garë shumë të rëndësishme që po zhvillohet në Angli dhe deri tani ka arritur të renditet në mesin e tetë konkurrentëve më të mirë për të fituar çmimin kryesor në ekspozitën botërore “Artes Mundi”. Ndërkaq prurjet e këtyre artistëve janë duke u ekspozuar në Muzeun Kombëtar “Cardiff” në Uells. Çmimi kryesor në vlerë prej 40.000 funtesh është një ndër çmimet më fitimprurëse në botë dhe më i madhi në Angli dhe i ndahet artistit më të mirë në çdo dy vjet. Rëndësia dhe vlera e këtij konkursi është duke u rritur çdo herë e më shumë dhe është konsideruar si një ndër organizimet më interesante të profilit të arteve bashkëkohore në Evropë. Qëllimi i tij është që të krijojë një platformë unike për artistët ndërkombëtarë që kanë emër në këtë fushë artistike dhe që ky çmim t’i inkurajojë sadopak, që prurjet e tyre t’i bëjnë të njohura në mbarë botën. Ndërkaq është njoftuar se në edicionin e sivjetmë në Uells janë prezantuar afërsisht 500 artistë nga 80 shtetet të botës. Tetë artistët e përzgjedhur posedojnë shkathtësi të veçanta për të reflektuar politikën që i rrethon dhe shumica prej tyre vijnë nga vendet ish-komuniste. Në mesin e tyre edhe Shqipëria e përfaqësuar nga Paci, pastaj renditen edhe vendet tjera si Bullgaria me Erain Çavusoglu, Rusia me Olga Chernysheva, Kyrgyzstani me artistët Kasmalieva dhe Muratbek Djumaliev. Artistët tjerë janë peruani Fernando Bryce, Chen Chieh-yen nga Tajvani dhe Yael Bartana nga Izraeli. Shumica e veprave pjesëmarrëse po vazhdojnë të tregojnë një fuqi kontinuele të artit filmik dhe videove artistike. Ndërkaq fituesi do të shpallet në datën 19 maj 2010.

Kthehu | 10.03.2010