Inva Mula: Mund të isha identifikuar me Mozartin gjerman

Ka ngjitur në skenën gjermane "La Traviatën”, me rolin e Violetës, të cilën e ka interpretuar para 24 vjetësh në Tiranë. Inva Mula tregon më shumë, për rolet e saj, por edhe për jetën private. Largimin e menjëhershëm nga Shqipëria pas rënies së "siparit të hekurt", ndjenjën që i jep Berlini, asaj duke u nisur nga fakti që babai ka lindur në Kosovë dhe nëna në Rusi. “ Unë jam tepër sensibël për arsye se gjithë ajo histori e imja, që identifikohet në historinë e gjithë popullit shqiptar dhe gjithë popullit të lindjes së vendeve ish-komuniste, është historia e rënies së Murit të Berlinit. Për këtë jam shumë e vetëdijshme sa herë që vij në Berlin dhe dua t'i them shumë faleminderit këtij qyteti, se në sajë të rënies së këtij Muri unë jam sot këtu, jam nesër në Itali, jam në Francë, jam kudo”, thotë sopranoja. “Jeta ime nuk ka qenë jetë e dhimbshme në raport me jetën e fëmijëve të grave ruse, për arsye se ne e dimë shumë mirë, që shumë nga këta fëmijë kanë përfunduar në internim, me vetëvrasje, me burgim, me mama vërtet të degdisur dhe këto kanë qenë jetë shumë të dhimbshme. Jeta ime ka qenë një jetë shumë e mirë në raport me gjithë këto histori të dhimbshme, por gjithnjë ka qenë një frikë, si të thuash, rusishtja ishte një mollë e ndaluar për mua, por në të njëjtën kohë edhe nuk kisha mundësi që të isha në pararojë të fëmijëve të tjerë, pasi e kisha gjithnjë nga mbrapa një gjë të pamoralshme për momentin, sepse kisha një mama të huaj”, shprehet Mula.

Kur flet për operën, ajo është diva e saj, megjithatë në muzikën gjermane e quan veten thjesht një spektatore. “Nuk mund të identifikohem me Wagner, as me Mahler, por mund të isha identifikuar me Mozartin gjerman”, përfundon Inva Mula.

Kthehu | 14.03.2010