Zyra e Auditorit Gjeneral zhvillon proces jo ligjor!

Prishtinë, 8 shkurt - Procesi i nisjes së përzgjedhjes nga vetë zyra e Auditorit të Përgjithshëm për auditor të jashtëm për auditimin e pasqyrave financiare të Zyrës së Auditorit të Përgjithshëm për vitin 2009, është kritikuar ashpër nga disa anëtarë të komisionit kuvendar për Mbikëqyrjen e Financave Publike. Anëtarët e këtij komisioni e vlerësuan të jashtëligjshme procesin e përzgjedhjes së kandidatëve për auditorë duke thënë se ajo është një thyerje ligjore, dhe zgjedhjen e tyre që nga fillimi e ka në kompetencë ta bëjë vetëm Kuvendi i Kosovës. Më i zëshmi në tërë këtë, ka qenë anëtari i komisionit nga ana e PDK-së, Gani Koci i cili vlerësoi se i gjithë procesi për auditorin e jashtëm është në kundërshtim më ligjin, konkretisht me nenin 6. Ai tha se i gjithë procesi i përzgjedhjes së auditorit të jashtëm për të audituar zyrën e Auditorit Gjeneral duhet të zhvendoset tek Kuvendi i Kosovës. “Zyra e Auditorit Gjeneral ka zhvilluar një proces jashtë normave ligjor. Këta kanë bërë një përzgjedhje, nga disa anëtarë në tre. I gjithë procesi duhet të zhvendoset te Kuvendi i Kosovës, i cili duhet ta shpallë konkursin dhe ta përzgjedh ofertuesin”, tha Koci. Sipas tij kërkesa e bërë nga zyra e Auditorit Gjeneral që nga tre të përzgjedhurit e tyre, komisioni ta zgjedh njërin nga ta mund të paraqet edhe konflikt interesi. I të njëjtit mendim ishte edhe Riza Smaka i cili po ashtu e vlerësoi si çështje të mundshme interesi që vetë AGJK-ja të bëjë përzgjedhjen e auditorëve të jashtëm, për të audituar punën e tyre. Edhe Safete Hadërgjonaj theksoi se procesi i përzgjedhjes së auditorëve të jashtëm për të audituar AGJK-në, duhet ta bëjë vetëm Kuvendi i Kosovës. Ndërsa, kryetari i komisionit Haki Shatri theksoi se zyra e Auditorit Gjeneral nuk bërë përzgjedhjen e auditorit të jashtëm por vetëm kanë bërë shpalljen e tenderit dhe i kanë sjellur ofertat në komision. “Sipas ligjit komisioni nuk ka të drejtë të vendos, por vetëm ti rekomandojnë Kryesisë së Kuvendit”, tha Shatri. Por, Arsim Rexhepi tha se nuk ka ndonjë paragjykim për përzgjedhjen e tre anëtarëve për auditor të jashtëm nga ana e AGJK-së, por pohoi se ligji është ai i cili e përcakton këtë çështje. “Ligji thotë që këtë çështje duhet ta zgjedhë Kuvendi i Kosovës”, tha Rexhepi. Mirëpo, auditori i Përgjithshëm Large Olofson tha se zyra e tyre as nuk i ka emëruar as përzgjedhur por vetëm i kanë zgjedhur tre ofertues të përgjegjshëm. Mirëpo ai pohoi se për ata kanë ardhur në Komision dhe është Komisioni që përzgjedh atë që dëshiron për auditor të jashtëm për të audituar AGJK-në. Olofson tha se nuk është thyerje e ligjit përzgjedhja e tre anëtarëve për auditor pasi që ata nuk vendosin se kush të zgjidhet auditor i jashtëm. Komisioni pas shumë diskutimesh nisjen e këtij procesi nga ana e AGJK-së e cilësoi si shkelje të procedurës, dhe tha se Kuvendi i Republikës së Kosovës duhet ta bëjë nisjen e këtij procesi, emërimin dhe përzgjedhjen e auditorit të jashtëm të zyrës së Auditorit Gjeneral të Kosovës.

Kthehu | 08.02.2010