Banka Uni Credit: Shqipëria me rritje ekonomike 9% gjatë 2010

Shqipëria pritet të ketë një rritje ekonomike prej 9% gjatë vitit 2010. Kështu u shpreh Kryeministri Berisha gjatë mbledhjes së Grupit parlamentar të Partisë Demokratike, duke cituar një nga bankat më të rëndësishme të Evropës, Uni Credit në një raport të saj. Sipas këtij raporti, Shqipëria gjatë këtij viti do të ketë një performancë të shkëlqyer ekonomike. Gjithashtu, banka thekson se përgjatë vitit 2009, në një kohë kur bota u prek rëndë nga kriza financiare, Shqipëria u shoqërua nga një rritje ekonomike prej 7%. Në vlerësimin e tij, Berisha theksoi se reformat ekonomike në vend janë të konsoliduara dhe parashikimi për rritjen e mëtejshme të ekonomisë në vend është një lajm i mirë për garancinë e vendeve të punës dhe për kontingjentin e të punësuarve në sektorin privat. "Këto ditë po lexoja parashikimet e njërës prej bankave më të mëdha dhe më serioze të Evropës dhe vlerësimet për ekonominë shqiptare ishin më maksimalet. Sipas vlerësimeve të Bankës 'Uni Credit', ndër më kryesoret në Evropë, Shqipëria këtë vit do të ketë një rritje rreth 9%. Kur e lexova para dy ditësh përshëndeta parashikimin optimist, por gjithashtu urova që ta kemi, por kur shoh këto statistika, them me bindje se parashikimi do të jetë një realitet. Po kjo bankë jep një rritje prej 7% për vitin 2009", u shpreh Berisha, duke nënvizuar se eksporti dhe rritja e tij në një ekonomi si kjo e jona, e cila nuk ka si qëllimin më kryesor rritjen e eksporteve është jashtëzakonisht domethënëse. "Reformat e këtij vendi janë konsoliduar. Kjo do të thotë punësim dhe garanci për vendet e punës, për kontingjentin më të madh të të punësuarve në sektorin privat", bëri të ditur Berisha. Në mënyrë të veçantë, Kryeministri u ndal tek një zhvillim, sipas tij, shumë i rëndësishëm për ekonominë e vendit, rritja e eksporteve "Made in Albania" mbi 100% krahasuar me një vit më parë. "Së pari, dëshiroj t'u përshëndes dhe vij tek ju me dy probleme, njëri prej të cilëve thellësisht pozitiv dhe i paprecedentë, që konsiston në dyfishimin e eksporteve 'Made in Albania', në janarin e këtij viti, krahasuar me janarin e vitit 2009, si dhe rritjen e ndjeshme të rieksporteve në janarin e këtij viti krahasuar me vitin 2009. Statistikat faktojnë se në janarin e viti 2009, Shqipëria eksportoi 56,7 mijë ton mallra me një vlerë prej 1 miliard e 413 milionë lekë. Kurse në janarin e vitit 2010 eksportet shqiptare rriten në rreth 103 mijë ton. Kjo rritje në tonazh në mënyrë të përpiktë dhe akoma më të thellë ndjek rritjen në vlerë, nga 1 miliard e 400 milionë që ishin eksportet e janarit të viti 2009, në 3 miliardë e 455 milionë lekë, në janarin e 2010, pra mbi 100%. Kjo është rritja më e madhe, më e paparë ndonjëherë, çka dëshmon se ekonomia shqiptare nis këtë vit me një stad të paprecedent", u shpreh Kryeministri gjatë takimit me deputetët e mazhorancës. Më tej, ai theksoi se rieksportet janë mallrat të cilat vijnë për t'u përpunuar në Shqipëri dhe rieksportohen. Shumica janë prodhimet e këpucëve, tekstilet dhe të tjera. Edhe ato, u shpreh Berisha, kanë një rritje të admirueshme, por rëndësinë kryesore e ka eksporti i vendit. "Ai tregon forcën e ekonomisë së vendit, por për hir të së vërtetës edhe në sektorin e rieksportit ku janë mbi 100 mijë shqiptarë të punësuar pritet një vit i bardhë, i bardhë si dëbora e Dajtit, të cilën pata kënaqësinë e madhe ta shijoj. Duhet ta dini se nga të gjitha bulevardet e natyrës, për mua dëbora është bulevardi i të gjitha bulevardeve. Rieksportet, në vitin 2009 kanë qenë 6,2 mijë ton me një vlerë prej 5,2 milardë, ndërsa në vitin 2010 vlera e tyre është rritur në 6 miliardë. Pra, ka një rritje në muaj prej 800 milionë lekë dhe një rritje prej rreth 17 apo 18% krahasuar me janarin e vitit të kaluar, çka do të thotë se ka një shtim të sigurtë të vendeve të punës dhe punësim në këtë sektor shumë punësues. Ky është sektori më punësues në Shqipëri krahasuar me sektorët e tjerë", vlerësoi kreu i mazhorancës. Gjithashtu, ai shtoi se të tilla janë edhe të dhënat e bankave, të cilat kanë patur një rikthim të shpejtë të depozitave. "Të nderuar deputetë, ky është një fillim shumë i mbarë. Ekonomia shqiptare është entuziaste, ndoshta nuk kam statistika të tjera, por jam i sigurtë se nuk ka vend tjetër që shënon dyfishimin e eksporteve në janarin e 2010. Pra, nis një vit shumë i mbarë", u shpreh kreu i qeverisë.

Qeveria do të nisë gjatë këtij viti autostradën Tiranë-Elbasan

Kryeministri Berisha deklaroi dje se brenda këtij viti qeveria do të nisë punimet për ndërtimin e autostradës së re Tiranë-Elbasan. Gjatë një bashkëbisedimi me qytetarët e Elbasanit, kreu i qeverisë theksoi se tashmë ka përfunduar projekti për ndërtimin e kësaj vepre jetike për qytetin e Elbasanit, por edhe për qytete të tjera, pasi do të shkurtojë distancat e tyre me Tiranën. "Unë dua t'u përcjell sot para jush një përshëndetje të përzemërt qytetarëve të Elbasanit, qytetarëve të jugut dhe juglindjes së Shqipërisë, si dhe t'i informoj ata se projekti për autostradën Tiranë-Elbasan ka përfunduar. Gjithashtu, dua t'i informoj se brenda këtij viti qeveria do të nisë ndërtimin e kësaj autostrade dhe se ky projekt, me tunelin e tij, shkurton në mënyrë të ndjeshme jo vetëm distancën Elbasan-Tiranë, por edhe distancën Korçë-Tiranë, Berat-Tiranë dhe Tepelenë-Tiranë", u shpreh Berisha. Ai vuri në dukje se pas rrugës së Arbrit, autostrada Tiranë-Elbasan do të jetë një nga projektet më madhore të qeverisë gjatë këtyre viteve. Kryeministri theksoi se qeveria është e vendosur që Shqipëria e vitit 2013 të jetë një Shqipëri krejt tjetër, ku shqiptarët nga të katër anët e vendit të lëvizin në një kohë dy herë më të shkurtër për të mbërritur në kryeqytetin e tyre. Po ashtu, Kryeministri konstatoi me kënaqësi se procesi i liberalizimit të vizave po ecën në mënyrë të sigurtë. Ai theksoi se qeveria ka plotësuar dhe plotëson çdo kërkesë që shtrohet ndaj vendit, në mënyrë që qytetarët shqiptarë, brenda afatit të përcaktuar, të lëvizin të lirë në mbarë hapësirën evropiane.

Kthehu | 08.02.2010