Gjenerali i çarmatosur dhe Misionari i Solanës

Monsieur Protektoratori (thoshte vetë se është i preferuari i Solanës me fotografinë e tij “RTK televizive” në dhomën e gjumit) Piter Fejti, i postuar në anë të KFOR-it, sot pas “deklaratës dje” kundër parakalimit të Davidit në sy të Goliatit, shkoi një hapë edhe më larg, dhe mjaft i nervozuar tha (citoj): “Nuk mund t’i afrohemi Bashkimit Evropian pa luftuar dhe pa zhdukur të keqen e krimit të organizuar dhe korrupsionit” (fund citati).

Vuajtja e Feithit

Monsieur Fejti po flet në shumës “nuk mund t’i afrohemi”, demek edhe ai së bashku me ne nuk po mund t’i afrohet BE-së shkaku i korrupsionit. Po, natyrisht, se ai është punëtor (edhe) i OKB-së dhe s’dihet a e pranon BE-ja. Por sa di unë, ai nuk ka pse t’i afrohet BE-së, sepse është në BE, madje është përfaqësuesi i parë i saj në një vend afrikan të territorit të BE-së. Unë, “shumësin” e tij, dua që, me qëllim të mirë, ta kuptoj si një lloj solidariteti të tij me ne - pretenduesit për integrime dhe bashkim-vëllazërime të ndryshme. Pra kërcënimin e tij në vetën e parë shumës, prapë më qëllim të mirë, dua të përkthej si qortim, pra jo si kërcënim, siç është në të vërtetë. Por “shumësin” e tij, prapë me qëllim të mirë, po e kuptoj se si ai, bashkë me ne, nuk po e lufton krimin e organizuar dhe korrupsionin, që në këtë mënyrë të mos mund të integrohemi në BE së bashku me të. Të gjithë habiten pse EULEX-i nuk po e lufton krimin! Sepse ashtu do të duhej ta luftonte Serbinë. Doganat nuk i kanë djegur shqiptarët, po serbët! Kush po i thyen kufijtë e Kosovës, o Monsieur Fejt? Prapë po e them me qëllim të mirë, Fejti në mënyrë qëllimkeqe e adreson krimin e organizuar si leje e pikërisht atyre që nuk e kanë në dorë armatën as policinë, e të cilat ai i ka në dorë bashkë me Lamberton e përgjumur dhe me ndonjë gjeneral gjerman që nuk ka qenë i lindur në kohën e Hitlerit.

Davidët “multietnikë”

Qe dhjetë vjet, pelegrinët misionarë humanitarë të armatosur deri në dhëmbë, s’po mund t’ia dalin krye me ata që i djegin doganat dhe organizojnë krim fetar, ekonomik dhe politik, por fajin e kanë këta Davidët “multietnikë” të armatosur me pistoleta uji, që nuk po e ndalin krimin, kështu duke e penguar Kosovën dhe Fejtin të integrohemi në Evropë. Qysh ndalet krimi pa armë? Mbase me “gjyqësinë” e UNMIK-Kosovo-EULEX-it?

Pas deklaratës së Monsieur Protektoratorit për “gjestin” e FSK-së, ja deklarata e tij e dytë, e menjëhershme, të cilën e citova në paragrafin më lartë të këtij shkrimi, qortimin kërcënues për ne që nuk po e luftojmë krimin e organizuar. Në luftë kundër “gjestit” të FSK-së dhe korrupsionit të Qeverisë, Protektoratorit i priu “opozita” dhe shpura e shoqërisë “civile” e postuar në të (në opozitë) si dhe llava e tablloidit medial e angazhuar për prodhimtari fabrikate spekulimesh politike, gjithnjë në interes dhe në shërbim të “çlirimtarëve” ndërkombëtarë, dhe gjithnjë kundër Kosovës së “kriminalizuar”. Kjo shpurë mercenare e ka ngulfatur përfundimisht mundësinë minimale të qartësimit legal dhe ligjor të relacionit të Kosovës me ndërkombëtarët. Kush ka kompetenca dhe fuqi reale ta luftojë krimin politik dhe ekonomik në Kosovë, dhe obligim i kujt është ky? Për gjendjen e krizës depresive në Kosovë, sipas protektoratorëve dhe gazetarëve tashmë kosovarë, nuk janë pushtetmbajtësit funksionalë të OKB-BE-së, por qenkan të varurit e tyre në pushtetin pa pushtet ekzekutiv, pa polici, pa armatë, pa diplomaci. Po, kjo propagandë anti Kosovës do të pinte ujë sikur Kosova të ishte e pavarur dhe sovrane, atëherë Qeveria do të ishte përgjegjëse edhe për krimin politik dhe ekonomik që e organizon sot “ligji” 1244 në Kosovë, dhe në shërbim të të cilit punojnë misionarët pelegrinë. Po sikur pushteti i Kosovës të lejohej ta kontrollonte tërë territorin e vendit, e sidomos atë në Veri ku krimi i organizuar bëhet në bashkëpunim me Galluçët e UN-së, atëherë përgjegjësia do t’u binte në kurriz vendorëve. Duhet të fshihet fakti i kolonizimit të Kosovës nga Serbia dhe kjo të mbulohet me “faktin” se paska ministra të korruptuar (!!!). Që ka, shkarkohen! Por kur të shkarkohen këta “të korruptuar” a do të çlirohet Kosova nga kolonizimi i Serbisë? Është interesante se si vetëm e vetëm pushtetet (të gjitha vendore) qenkan të korruptuara, kurse pushteti real i okupatorit nr. 1244, qenka fare inoçent, i pafajshëm, qenka një naiv i armatosur deri në dhëmbë dhe i logjistikuar me 37 polici të tij sekrete antishqiptare.

A është KFOR-i mision i UNMIK-ut apo i NATO-s?

“Relacionet” (marrëdhëniet politike të vendorëve me ndërkombëtarët) u bënë të “paqarta” menjëherë pas 15 qershorit 2008. Tash “nuk dihet” kush është pushtet real në Kosovë që po e lejon krimin e organizuar dhe kolonizimin e Kosovës nga Serbia. Përmbi aktet zyrtare, media shqipfolëse e UNMIK-ut ende po na stërvit të kapërcejmë “në sfera të tjera” (të simbolikës politike, hermetikisht metaforike dhe e cila prodhon paqartësi) duke rezonuar me hamendje dhe me “analiza” aparatçikësh, për të cilët NATO-ja është më e rëndësishme për Kosovën sesa vetë Kosova! Enveri thoshte se kur të zhduket populli shqiptar, mbetet vepra e Partisë së Punës! Kur të na zhdukin fare do të mbetet vepra e lavdishme e UNMIK-ut në Kosovë, të cilën do ta kremtojnë serbët e paarmatosur në FSK. Tetë vjet UNMIK-u i ndërtoi relacionet me vendorët “kosovarë”, por kur skaduan këto “relacione”, duke u vendosur një realitet i ri (Pavarësia) me akte “ligjore” (në Pakon e Ahtisarit të vulosur në Parlament, Kushtetuta), protektoratorët vazhduan “të mos i kenë” të qarta relacionet e vendorëve me misionet e UNMIK-ut (ICO-në EULEX-in, KFOR-in, etj). A është KFOR-i mision i UNMIK-ut apo i NATO-s? Këtë mos pritni t’jua tregojnë elitarët e përhirtë të Brukselit, që me rastin e “konfliktit” NATO-FSK (!!!) e përmendnin NATO-n, e jo KFOR-in. Si duket, Kushtetutën me paragrafë diskurzivë, publicistika prounmikistaneze, dhe opozita politike, Kushtetutën e Kosovës e lexojnë si libër për deshifrimin e ëndrrave, si libër simbolesh që “deshifrojnë” lloj-lloj kuptimesh kontradiktore për njësovranitetin ose dysovranitetin e Kosovës, për shembull si do të përfaqësohet në Bërdo të Sllovenisë, në krye me Zanjerin. Jaap de Hoop Scheffer-i, kur ishte shef i NATO-s, deklaronte se nuk i kishte të qarta relacionet ndërkombëtare me vendorët në Kosovë, lëre ne po i paskëshim të qarta! Po ka (ndër ne) që i kanë të qarta. Sidomos ata që thonë se KFOR-i është NATO! Këta e kanë të qartë punën, më shumë sesa e ka të qartë vetë Scheffer-i.

“Politikë mesjetare”

Vërtet, që nga 15 qershori 2008, juridikisht çdo gjë është e qartë, përveç kur kjo qartësi futet në mikserin e mediave (mediokritike) në shërbim të koniunkturave spiunazhiste të lloj-lloj mafiozëve ndërkombëtarë. Kështu “realizmi politik” shndërrohet në letërsi abstrakte prejudikimesh mesjetare: jo kështu është, jo kështu nuk është! “Politikë mesjetare”, sepse në mesjetë, si sot në Kosovë, politikën e bënin shtrigat dhe priftërinjtë, sot e bëjnë spiunët ndërkombëtarë, të cilët gjejnë argumente që për këtë situatë, bashkë me opozitën, ta fajësojnë qeverinë “e korruptuar”. Pra kështu i thonë botës: shqiptarët nuk dinë dhe nuk mund të bëjnë shtet! Gati e kanë bindur edhe popullin se jo serbët dhe ndërkombëtarët, por shqiptarët janë të korruptuar! Dhe që ne të frikohemi prej KFOR-it, priftërinjtë vazhdojnë të na bindin se KFOR-i është NATO, kurse shtrigat pelegrinë insistojnë se KFOR-i nuk është NATO. Pse mistifikojnë kur vetë KFOR-i tregon për vete se çka është puna e tij (paqe-ruajtëse, e jo “liri-ruajtëse”). KFOR-i e ruan “paqen” “situatën stabile” permanente, e jo pavarësinë e Kosovës, sepse pavarësinë as nuk e njeh, as nuk e sheh! Por Monsieur Fejti, edhe pa e njohur shtetin e Kosovës, do të na integrojnë në BE, por me një kusht që ne të paarmatosurit ta ndalojmë krimin e organizuar politik dhe ekonomik në Kosovës, ku sundon KFOR-i dhe serbë të ndryshëm të Zanierit, por shqiptarët qenkan të korruptuar dhe organizatorë të krimit. Njësoj siç thoshte dikur Milosheviqi.

KFOR-i thotë se UNMIK-u është Bibla e tij, kurse ende gjen ish-shqiptarë më të mençur se KFOR-i, që i thonë KFOR-it, jo nuk është Bibla e juaj UNMIK-u, po Bibla juaj është NATO-ja, sepse mercenarët që 10 vjet i ka mësuar UNMIK-u që këta t’i dinë punët më mirë sesa që i di vetë KFOR-i për vetën e tij. Çka po ndodh sot brenda në NATO (jashtë kontekstit politik të Kosovës) ti gjen qindra shkrime në internet, por Monsieur Protektoratori, mendon se, hajt, shqiptarët nuk mund t’i kenë të qarta (të paleverdishme, të padobishme) “paqartësitë” e marrëdhënieve konfidenciale bibolare, qe s’dua të them - në cilat hemisfera. Buajt po shtyhen ndër vete, po shtrydhët Kosova si bretkosë midis tyre. Këta zotërinj publicistë, të devotshmit e monsieureve të Brukselit, dhe këta gjeneralë ish-shqiptarë turpësisht të çarmatosur nga KFOR-i, dhe të gjithë ish-luftëtarë për demokratizimin e Serbisë, janë ata që sot sillen në qark pushtetesh rrotative dhe opozitash kuslinge në ringishpillin e vërdallëshëm të posteve politike, janë pushtetarë (tash në opozitë) dhe administratorë në raunde turnesh mandatore në një vend pa shtet. Kishte dhe ka shumë pushtete në Kosovë, por shteti nuk është askund, nuk po e pranon KFOR-i. A nuk është kjo e qartë?

Enklavat

U tmerrua ky KFOR-Goliati nga një revole plastike e Davidit të vogël që ta spërkatë fytyrën me ujë. Kur gjeneralët ish-shqiptarë (tash kosovarë) që dikur i çarmatosi KFOR-i, e panë çka bëri sot Davidi i vogël, bërtitën: çka bëjmë ne pa KFOR-in? Kush na çarmatos ne kur të largohet KFOR-i!? Çka bëjmë ne pa Serbinë, të cilën KFOR-i po e mbron nga “terroristët” shqiptarë dhe kështu po e garanton paqen dhe “stabilitetin” në Kosovë? A e dini ju që pa KFOR-in, terroristët shqiptarë do ta ndalonin “qarkullimin e lirë” të krimit të organizuar përtej Urës së Ibrit, lumi i të cilës urë rrjedhë në Serbi, e krimi rrjedhë këndej poshtë nga Prishtina deri në Kamenicë, kah sheh targa “legale” maunash me “PR” e jo me “KS”. E pasandaj Fejti na thotë, stop për Evropë, ndaleni krimin e organizuar, që doni në Evropë! Por ai nuk e mbiemëron “organizatoren”, atë vetëm e aludon, por fare gabimisht dhe me qëllim shumë të keq politik. Sipas monsieur protektoratorëve, shqiptarët po e bëkan kolonizimin e Kosovës, e jo UNMIK-u me serbë të ndryshëm të Tadiqit dhe me të gjitha enklavat e popave të devotshëm - besimtarë të Krishtit, deri te Car Llazari. Krimi i organizuar ndodh para hundëve të forcave të armatosura ndërkombëtare, para policisë së EULEX-it. Madje dhe para hundëve të forcave multietnike (të FSK-së) së paarmatosur, ose të armatosur lehtë sipas Ahtisarit, me pistoleta uji. Hajt me folklor, pak: kujt ia turbullon ujin ky David qengji FSK!?

Muluni!!!

Mule, kërkoni falje! Derisa i kërkoni falje UNMIK-ut, i keni kërkuar falje të gjitha misioneve nën komandën e tij, prej ICO-së e deri te EULEX-it, që do të thotë, automatikisht edhe KFOR-it. Ej bre, qysh kundër NATO-s?! Të gjithë atyre që nuk e njohin Pavarësinë e Kosovës, të gjithëve duhet t’u kërkojmë falje, dhe t’i falënderojmë që nuk po e pranojnë Pavarësinë e Kosovës. Çka na duhet neve pavarësia kur e kemi NATO-n? Tregoni se qe një shekull shqiptarët kanë luftuar për paqe, e jo për liri! Por, kush merr vesh! Përkundrazi, ne s’po lëmë gjë të keqe pa bërë kundër NATO-s, për inat të NATO-s po i kremtojmë heronjtë kombëtarë, dhe nuk po na pritet derisa të vdesin “heronjtë kosovarë” që t’i kremtojmë duke lëshuar në qiell pëllumba të bardhë të paqes. Ne po i kremtojmë heronjtë kombëtarë, ndaj serbët nuk po i merr gjumi prej frikës. Gjynah! Që do të thotë - po i frikojmë serbët me Adem Jasharin e vrarë nga serbët, se më i rrezikshëm është Adem Jashari i vdekur, sesa popat e gjallë në Graçanicë në krye me Tadiçin demokrat dhe me armatën e tij “paqësore” të shtetit terrorist të Serbisë, me të cilin KFOR-i mban marrëdhënie “bilaterale”, derisa nuk e pranon shtetin e Kosovës! Ne jemi betuar se do ta vazhdojmë “diskriminimin pozitiv” të pakicave, si në kohën e Titos, derisa pakicat organizojnë në Veri krimin shtetëror ekonomik të Serbisë, të cilin Protektoratori po ia ngarkon klasës politike shqiptare, e cila në vend se ta luftojë krimin serb, po e armatos FSK-në me pistoleta uji!

Çka bëjmë ne pa ata që nuk e pranojnë Pavarësinë e Kosovës? Kur të çlirohet Kosova, kush do t’i mbrojë ata që kanë bashkëpunuar me UNMIK-un, që do të të thotë me Serbinë? Neve s’po na “çlirojnë” sebepi që, me i marrë ne punët në dorë, menjëherë kërcet lufta qytetare midis puro-shqiptarëve dhe kosovarëve ish-shqiptarë!

Paqësorët dhe “terroristët” kosovarë

Nëse më në fund, nëse fillojmë ta luftojmë krimin dhe korrupsionin, edhe pa na e pranuar sovranitetin e Kosovës, do të na integrojnë në Evropë, sipas Monsieur Fejtit. Ky është edhe qëllimi i tyre, të na integrojnë në Evropë, por jo si shtet, as si komb, por si një grumbull pa identitet as kulturor as historik. Sepse ata tashmë me akte zyrtare (Ahtisari) kanë vendosur që Kosova është djep i kulturës dhe historisë serbe. Ata janë këtu ta mbrojnë atë kulturë dhe atë histori nga se e rrezikojnë ata që Milosheviqi i quante terroristë shqiptarë. Në Kosovë, sipas tyre, ekzistojnë dy specie nacionale: 1. paqësorët kosovarë dhe 2. “terroristët” shqiptarë!

Kthehu | 10.03.2010