Kryesia e Kuvendit diskutoi rastin Kurti

Kërkesa e Këshillit kundër procesit gjyqësor ndaj Albin Kurtit, për seancë të jashtëzakonshme në Kuvendin e Kosovës është shqyrtuar në mbledhjen e sotme të Kryesisë, me ç'rast është vendosur që kjo kërkesë t'i dërgohet Komisionit për të drejtat e njeriut, barazi gjinore, për persona të pagjetur dhe peticione dhe Komisionit për legjislacion dhe gjyqësi dhe pas raportit me rekomandime që do të sjellin këto komisione, do të vendoset për procedimin e mëtejmë të kësaj kërkese.

Kryeparlamentari Jakup Krasniqi ka thënë pas mbledhjes së Kryesisë së kjo kërkesë duhet t'i kalojë procedurat nëpër dy komisione, pastaj të vendoset për procedurat tjera në Kuvend.

Ai nuk ka dashur të saktësojë nëse Kuvendi do të dalë me ndonjë rekomandim pas debatit për këtë çështje, ndërkohë nuk ka dashur ta kualifikojë as si gjyq politik apo jopolitik, procesin gjyqësor ndaj liderit të Lëvizjes "Vetëvendosje", Albin Kurti.

"Ne si organ ligjvënës nuk e kemi përgjegjësinë për të kualifikuar si gjyq politik ose jopolitik. Ne respektojmë kërkesën e shoqërisë civile dhe nënshkrimin e gati 150 mijë qytetarëve që të debatojmë këtë çështje dhe të kërkojmë që gjithçka të zgjidhet në kuadër të ligjeve që janë në fuqi", ka thënë Krasniqi.

I pyetur nëse do të kërkojë Kuvendi që të vihen para drejtësisë policët rumunë që kanë vrarë dy dhe plagosur mbi 80 qytetarë në protestën e 10 shkurtit të vitit 2007, Krasniqi ka thënë se, policët ndërkombëtar kanë një lloj imuniteti dhe nuk i përgjigjen legjislacionit të Kosovës.

Duke komentuar deklaratat e ambasadorit amerikan Kristofer Dell, përkitazi me korrupsionin në Kosovë, Krasniqi ka theksuar se Kuvendi i ka bërë ligjet dhe institucionet e pavarur përgjegjëse për të luftuar krimin, korrupsionin, kontrabandën dhe trafiqet e ndaluara dhe tani është detyrë e institucioneve përgjegjëse që t'i kryejnë detyrat e tyre konform Kushtetutës dhe ligjeve në fuqi.

Kthehu | 16.03.2010