Në 21 janar çel dyert për herë të parë Shkolla Shqipe

Diaspora

Në 21 janar çel dyert për herë të parë Shkolla Shqipe

Më: 16 janar 2017 Në ora: 14:35
Në të majtë të fotos, Bashkim Hazizaj (nismetar i shkolles se pare shqipe në Luksemburg)

Në Luksemburg do të çelet në 21 janar 2017 Shkolla e parë Shqipe. Në një intervistë dhënë për ATSH-në, Bashkim Hazizaj, themelues i shoqatës “ILIRI” në Luksemburg dhe një prej nismëtarëve të shkollës shqipe, tregon se përpjekjet për të realizuar këtë nismë kanë filluar me emigracionin e shqiptarëve jashtë vendit.

Ai tregon se në 100- vjetorin e parë të shkollës shqipe (që nga shkolla e parë shqipe në Korçë), ëndrra e rilindasve është bërë realitet, pasi gjuha shqipe tashmë mësohet në shumë vende të botës ku jetojnë e punojnë shqiptarë, tanimë edhe në Luksemburg.

Por, si lindi nisma për hapjen e Shkollës së Parë Shqipe në Luksemburg?

Pas viteve 1999-2000, shumë shoqata që kishin si objektiv ndihmën e rezistencës së popullit shqiptar në ish Jugosllavi u gjendën pa objektiv madhor, lufta mbaroi. Kështu doli një situatë e re, ku filloi edhe riorganizimi i shoqatave dhe ojektivave të tyre. Në këto momente u krijua shoqata “Shqiponjat”- Les Aigles, që më vonë në 2006 mori emrin “ILIRI Asbl” Shoqata e Shqiptarëve dhe miqtë e tyre në Luksemburg”.  Si qëllim kryesor u vendos ruajtja dhe përhapja e kulturës shqiptare në Luksemburg, Francë, Gjermani dhe Belgjikë”, tha Hazizaj.

“Si fillim u krijua grupi i këngëve dhe valleve “Shqiponjat”. U vendosën kontaktet me përfaqësitë e ambasadës shqiptare në Beneluks, ambasadën e Maqedonisë si dhe me ambasadën e Kosovës në Beneluks. Komuniteti shqiptar në Luksemburg funksionon i bashkuar dhe gjithmonë flet me një zë të vetëm për çështjet madhore . Një nga objektivat kryesore ishte hapja e shkollës shqipe”, tha ai.

Më tej, Hazizaj vuri në dukje se “nismës së shoqatës ILIRI për hapjen e shkollës shqipe në Luksemburg iu bashkua edhe Shoqata GALA dhe një grup i shoqërisë civile. Në shtator 2016, komuniteti pati takim me Ambasadën e Shqipërisë në Beneluks, një takim i tillë ishte zhvilluar edhe me ambasadën e Kosovës në fund të 2015, që shërbyen si takime vendimtare për hapjen e shkollës. Kështu u krijua grupi nismëtar me pjesëmarrjen e shoqatës ILIRI (me drejtues Bashkim Hazizaj), Artan Vigani (shoqata GALA), Zamira Poda (shoqëria civile) dhe më vonë këtij grupi iu bashkuan edhe mësueset Fatmira Hoxha Çoka, Saranda Syla Kokalla.

Sipas tij, pas një pune sistematike disa mujorshe, takime me prindërit e fëmijëve, konsultime me ministren e Arsimit në Tiranë si dhe konsultimin me ambasadat tona, konsullat dhanë dy librat e parë që do të shërbejnë si baza kryesore didaktike. Më pas u kontaktuan edhe shoqatat e tjera në diasporë për përvojën e tyre rreth këtij procesi, si dhe komunitetet e tjera në Luksemburg, sidomos ato portugeze dhe italiane,  që për Hazizaj, janë dy komunitetet më të mëdha pasi përbëjnë 30% të banorëve të Luksemburgut.

Gjatë intervistës, Hazizaj pohon se komuniteti shqiptar e ka pritur hapjen e shkollës shqipe me shumë gëzim, ku vetëm në javën e parë të janarit u regjistruan 15 fëmijë.  Mësimi i gjuhës shqipe do të fillojë në datën 21 janar, ndërkohë që në Dukatin e madh të Luksemburgut jetojnë rreth 5000 shqiptarë.

Shumica e tyre janë vendosur gjatë harkut kohor 1965-1990, dhe janë nga ish Jugosllavia, Kosova, Presheva Medvegja e Bujanovci,  ish Republika federative e Maqedonisë dhe Mali i Zi. 20 familjet e para shqiptare erdhën nga Shqipëria nëpërmjet Italisë, pas eksodit të vitit 1990.

Shoqata “Iliri Asbl”, që drejtohet nga Bashkim Hazizaj (prej 17 vitesh jeton në Luksemburg me familjen) ruan lidhjet me atdheun, si dhe bën të mundur ndërmjetësimin pranë strukturave shtetërore të Luksemburgut dhe komunikimin me përfaqësitë diplomatike të vendeve të origjinës. Anëtarësia e shoqatës “Iliri” përbëhet prej shqiptarëve të Shqipërisë, Kosovës, Maqedonia, Mali Zi dhe nga Presheva Medvegja e Bujanovci.

Sot mund të lexoni Shfletoni kopertinat