Sekuestrimi i 424 kilogramëve kanabis sativa nga policia greke, pas bllokimit të një skafi në plazhin e Platarias në Igumenicë, ka vënë në pranga një shqiptar.
Mësohet se skafisti i arrestuar është 42-vjeçari sarandjot Dritan Jorgji, i njohur ndryshe si “Tan Zimani”.
Jorgji u kap teksa tentonte të nxirrte drogën nga gomonia dhe ta hidhte në breg.
Operacioni u krye nga policia shqiptare dhe ajo greke, ku ka qenë pala shqiptare ajo që ka sinjalizuar për gomonen e ngarkuar me drogë, mesnatën mes të mërkurës dhe të enjtes.
Brenda në gomone u gjetën 36 pako me kanabis, me peshë totale 424 kilogramë.
Aktualisht hetimet janë në vijim, për të zbuluar persona të tjerë të përfshirë në këtë tentativë trafikimi.
