Policia italiane në Milano ka arrestuar 46-vjeçarin italian Dante Di Lalla, pak orë përpara dasmës së tij, raportojnë sot mediat italiane.
Së bashku me të u ndalua edhe shqiptari 29-vjeçar, Zef Frisku, i cili ishte dëshmitar në dasmën e mikut të tij italian.
Mësohet se arrestimet vijnë pas shkatërrimit të një bande që merrej me grabitje automjetesh. Pasi vidheshin makinat çmontoheshin dhe futeshin në tregun e zi si pjesë këmbimi.
Sipas mediave vendase nuk kanë qenë të pakta rastet kur automjetet shiteshin edhe në Shqipëri. Në total, në prangat e karabinierëve përfunduan 12 persona; 1 hungarez, 7 shqiptarë dhe 4 italianë.
Mediat vendëse kanë bërë edhe një profil të të arrestuarit Zef Frisku, i cili sipas policisë është person me rrezikshmëri shoqërore. Në 2015-n ai do të përfundonte në prangat e uniformave blu pasi u prangos pas përleshjes me këta të fundit.
Ai akuzohet gjithashtu për një sërë veprash penale si, armëmbajtje, dhunimin e një zyrtari publik, pastrim parash dhe grabitje.
