Drejtues të Fondit për Sigurimin e Depozitave të Kosovës prezantuan raportin vjetor për vitin 2015, ku shënon edhe fillimin e bashkëpunimit teknik me BERZh për zhvillimin e sistemit për kompensim të depozitorëve.
Marrëveshja e grantit me BERZh për zhvillimin dhe implementimin e sistemit të kompensimit të depozitorëve është në vlerë prej 255 mijë e 500 euro me bashkëfinancim nga Fondi për Sigurimin e Depozitave. Kështu theksoi me këtë rast kryesuesja e Bordit menaxhes të FSDK, Shkendije Hima.
Ajo tregoi për rritjen e nivelit të limitit të sigurimit të depozitave në 4 mijë euro nga datë 1 janar i këtij viti,si dhe rritjen e vazhdueshme të totalit të depozitave të siguruara që sipas saj tregon besim të vazhdueshëm publik në sektorin bankar të Kosovës.
Hima tha se në fund të vitit 2015, totali i depozitave ka arrit në 2 miliardë e 500 milionë euro.
Ministri i Financave, Avdullah Hoti duke folur për rëndësinë e këtij Fondi, tha se është i kënaqur me rritjen e limitit të depozitave në vlerë prej 4 mijë euro sa ishte 3 mijë euro.
Hoti ka vlerësuar lartë mbështetjen e FSDK nga ana e BERZh dhe premtoi se ky fond do të ketë mbështetjen e vazhdueshme edhe nga Qeveria e Kosovës.
Edhe përfaqësues të BQK theksuan se marrëveshja me BERZh mundëson Fondin të menaxhojë depozitat edhe më suksesshëm. Sipas këtij Fondi, niveli i limitit të depozitave nga viti 2018 do të rritet në vlerë prej 5 mijë euro.