Konfindustria mbështet vendimin e Kuvendit dhe Qeverisë së Kosovës për të përdorur prefiksin ndërkombëtar të Shqipërisë në sektorin e telekomunikacionit dhe kërkon ngritjen e një grupi pune me ekspertë të fushës.
Gjergj Buxhuku, Administrator i Përgjithshëm i Konfindustria shprehet sot në një deklaratë për median se ky vendim përbën një domosdoshmëri financiare për Kosovën, pasi deri sot, përdorimi prej më se 13 vjet i prefikseve të vendeve të treta, i ka shkaktuar ekonomisë dhe qytetarëve humbje, që shkojnë në qindra milion euro.
"Përdorimi i prefiksit të Shqipërisë shoqëruar me marrëveshjet respektive teknike dhe financiare mes dy vendeve do të bëjë të mundur që një pjesë e madhe e kostove të tilla t'i kthehen ekonomisë dhe buxhetit të Kosovës", u shpreh Buxhuku.
Konfindustria vlerëson se zbatimi i vendimit të autoriteteve kosovare për njësim të prefiksit telefonik me Shqipërinë përmban në mënyrë të gërshetuar jo vetëm vlera të mëdha financiare, por dhe gjeostrategjike për rajonin e Ballkanit Perëndimor dhe më gjerë dhe do të ndeshet me rezistencë të fortë të vendeve të prekur në organizmat ndërkombëtare rregullatore të fushës.
Konfindustria shprehet se është e nevojshme që shpejt të krijohet grupi i punës me profesionistë vendas dhe të huaj të fushës së telekomunikacionit, financës dhe juristë për të vlerësuar përfitimet, kostot financiare të ekonomisë mbarëkombëtare dhe gjetjen e rrugëve ligjore për zbatimin e vendimit në kushtet e të drejtës dhe përgjegjësive ndërkombëtare të Shqipërisë dhe Kosovës.
