Një biznesmen kroat është arrestuar sot në Londër për shkak të akuzave se ka keqpërdorë fonde milionëshe të kompanisë së tij, duke shkaktuar falimentim masiv, që tash është çështje e shqetësimit kombëtar në Kroaci.
Policia londineze ka njoftuar se 66 vjeçari, Ivica Todoriq, themelues i kompanisë më të madhe kroate të ushqimit, Agrokor, do të paraqitet më vonë gjatë ditës në një gjykatë në Londër.
Emri i Todoriqit ishte i përfshirë në Europol, në listën e personave më të kërkuar të Evropës për dyshime për korrupsion, falsifikim të dokumenteve administrative dhe mashtrim, raporton agjencia AP nga Londra.
Ai dhe ish-ndihmësit e tij tash janë nën hetime lidhur me rënien financiare të kompanisë.
Todoriq, i cili i ka hedhur poshtë akuzat për keqbërje, ishte akuzuar për kqepërdorim të dhjetëra miliona eurove të fondeve të kompanisë, Agrokor, për përfitime personale.
