Nisin votimet në Rusi, Putin pritet të fitojë mandatin e katërt - Bota Sot
Nisin votimet në Rusi, Putin pritet të fitojë mandatin e katërt

Evropë

E diel, 22 prill 2018

Nisin votimet në Rusi, Putin pritet të fitojë mandatin e katërt

Më: 18 mars 2018 Në ora: 08:26
Vladimir Putin

(E plotësuar) - Qytetarët me të drejtë vote në Rusi janë duke votuar në zgjedhjet presidenciale, ku pritet që presidenti aktual, Vladimir Putin të fitojë mandatin e katërt. Pyetja e vërtetë është nëse pjesëmarrja në votime do të jetë e lartë, në mënyrë që Putin të fitojë bindshëm.

Zgjedhjet në Rusi përkojnë me katërvjetorin e aneksimit të paligjshëm të gadishullit ukrainas të Krimesë nga Moska.

Presidenti në detyrë, Putin 65-vjeç, teksa ka votuar në Moskë ka thënë se çdo pjesëmarrje e votueshme që do t’i lejojë presidentit të përmbushë detyrat e tij është një “sukses”.

Raportohet se pjesëmarrëja e votuesve në Lindjen e Largët të Rusisë tashmë është më e lartë se sa ka qenë në zgjedhjet e vitit 2012.

Grupi i pavarur për monitorimin e zgjedhjeve Golos, ka raportuar për parregullsi gjatë votimeve, përfshirë edhe vendosjen e kutive të votimit larg kamerave të vëzhgimit dhe ndryshimet në minutën e fundit në regjistrin e votuesve, që besohet se bëhet për të rritur pjesëmarrjen në zgjedhje.

Në zgjedhjet presidenciale marrinë pjesë tetë kandidatë, por shtatë kandidatët e tjerë, sipas sondazheve, qëndrojnë shumë larg Putinit. Sipas sondazheve, kandidati i Partisë Komuniste Pavel Grudinin ka 7 për qind të votave, ndërkaq gazetarja Ksenia Sochak 2 për qind.

Kandidatët e tjerë përfshijnë Vladimir Zhirinovsky, Sergei Baburin, Maksim Suraikin, Boris Titov dhe Girogy Yavlinsky.

[Tetë kandidatët në zgjedhjet presidenciale ruse]
Tetë kandidatët në zgjedhjet presidenciale ruse

Sipas Qendrës për Studime të Opinionit Publik, organizatë e afërt me Kremlinin, Putini sipas sondazheve, do të fitojë 69 për qind të mbështetjes së rusëve.

Sipas një sondazhi të bërë nga Gallup më 2017, 80 për qind e rusëve miratojnë udhëheqjen e Putinit, ndërkaq 40 për qind u besojnë zgjedhjeve në Rusi.

Rivali i vetëm i madh i Putinit është lideri opozitar dhe aktivisti kundër korrupsionit Aleksei Navalny, i cili nuk është lejuar të marrë pjesë në zgjedhje, pasi më parë ishte dënuar për keqpërdorim, akuzë kjo që gjerësisht shihet si e motivuar politikisht.

Navalny u ka bërë thirrje rusëve që të bojkotojnë zgjedhjet presidenciale.

Për zgjedhjet presidenciale, Policia në Moskë ka njoftuar se ka angazhuar 17 mijë oficierë, trupa të Gardës Kombëtare dhe personel tjetër të sigurisë.

***

Qendrat e votimit janë hapur në Rusi, aty ku sot votohet për zgjedhjet presidenciale. Vladimir Putin kërkon mandatin e tij të katërt në këtë post.

Rezultatet e para të këtyre zgjedhjeve pritet që të shpallen pasditen e së dielës.

Vladimir Putin është udhëheqësi dominant i Rusisë që nga viti 1999, si President ose si Kryeministër. Ai po shpreson për një mandat 6-vjeçar dhe përballë ka 7 kandidatë të tjerë.

Por, opozitari kryesor i Putinit, Alexei Navalny, nuk është lejuar që të marrë pjesë në këto zgjedhje presidenciale për një dënim për mashtrim, për të cilin Navalny thotë se është i motivuar politikisht.

Sot mund të lexoni Shfletoni kopertinat
Sondazh
test