Kosova ka shumë futbollistë që luajnë me sukses në klubet e ndryshme evropiane. Në edicionin e ri pritet shumë prej tyre të shpërthejnë dhe madje të jenë edhe bartës të lojës. Një talent që po lë gjurmë në elitën e futbollit belg, gjithsesi është edhe Mërgim Vojvoda, i cili është me prejardhje nga Kosova. Djaloshi 21-vjeçar me sukses po luan në petkun e Mouscron-it, një ekipi e njohur. Mbrojtësi i djathtë shqiptar në tri ndeshjet e para u paraqit standard dhe ka dhënë maksimumin. Ai për tri ndeshje gjithsej u paraqit 185 minuta dhe u ndëshkua edhe me karton të verdhë në hapje të edicionit, kundër Anderlecht. Në tri ndeshjet e para pësuan tri humbje dhe të gjitha me rezultat minimal. Dy humbje si vendas, 1:2 nga Anderlecht-i dhe 0:1 nga Charleroi, ndërsa si mysafir pësuan me rezultat 2:1 nga Oostende. Skuadra e Vojvodës nuk ka pasur fat deri më tash e cila renditet e fundit në renditje pa pikë, me shpresë se në fundjavë do të shijojnë pikët e para. Vojvoda ndihet mjaft mirë në klubin belg dhe ka ambicie të mëdha. Ndryshe është anëtar i kombëtares së Shqipërisë U-21, i cilin beson e shpreson se me ekipin e tij nuk do të rrezikohen për të rënë nga elita. Futbollisti i talentuar në intervistën për gazetën kombëtare “Bota sot” tregon se sa është vështirë të luhen në superioren belge dhe përshtypjet e tija në tri sfidat e deritashme dhe për humbjen nga Oostende në çastet e fundit, si dhe do t’i bashkohet kombëtares së Kosovës apo do të qëndrojë edhe më tutje për Shqipërinë U-21.
“Bota sot”: Mërgim, në tri ndeshjet e para luani standard për Mouscron-in, si po ndihesh?
Mërgim Vojvoda: Mirë shumë. Jam shumë i lumtur për fillim në elitën belge, në ekipin Mouscron-in.
“Bota sot”: Në tri ndeshjet e para po aq humbje, duke se skuadra nuk po ka fat?
Mërgim Vojvoda: Po, besoj se na mungon pak fati! Mirëpo, jemi edhe skuadër e re, kështu që besoj se me kohë do të ecim para.
“Bota sot”: Me Ostenden pësuat humbje në finish, iu mungoi fati sportiv?
Mërgim Vojvoda: Kemi luajtur mirë kundër një pretendenti për titull edhe pse kemi humbur në minutat e fundit. Besoj se mos ta kish japë penaltinë për Oostenden nuk kish me qenë e njëjta ndeshje.
"Bota sot”: Sa është vështirë të luash në elitën belge?
Mërgim Vojvoda: Elita belge është shumë e vështirë sidomos fizikisht, por edhe teknikisht.
“Bota sot”: Me 20 gusht takoheni me St. Truiden-in, a besoni në fitoren e parë dhe sa është vështirë ndaj këtij rivalit?
Mërgim Vojvoda: Besojmë dhe shpresojmë në fitore. Ne duhet të marrim tri pikë në shtëpi kundër këtij rivalit, edhe pse do të jetë e vështirë, por na duhen tri pikët e para.
“Bota sot”: Debutuat kundër Anderlecht-it, a mendoni se ishte prej sfidave më të vështira për ju?
Mërgim Vojvoda: Besoj se kemi pas debutim të vështirë, kemi lozur deri tani me tri skuadra dhe se lozin çdo vit ne play-off 1. Por e kemi kallëzuar veten si skuadër se mundem me i shkaktuar probleme këtyre skuadrave.
“Bota sot”: Cilat janë synimet e skuadrës Mouscron?
Mërgim Vojvoda: Shpresojmë të lozim play-off 2 e mos të kemi problem për mbetje në ligë.
“Bota sot”: Cili është synimi juaj si futbollist i ri?
Mërgim Vojvoda: Kam ëndrra të mëdha edhe pse një herë me duhet të fokusohem te Mouscron-i, të kam sa më shumë minutazh.
“Bota sot”: Jeni pjesë e kombëtares së Shqipërisë U-21, a do t'i qëndroni besnikë apo keni mendjen për Kosovën?
Mërgim Vojvoda: Jam krenar dhe i lumtur për të dy kombëtaret, por akoma nuk kam menduar për këtë, por shpresoj një ftesë sa me shpejt.
“Bota sot”: Sa jeni i kënaqur me kushtet?
Mërgim Vojvoda: Kemi kushte të mira dhe kemi staf profesional.