Tirana dhe Partizani përgatiten për derbin e 146 të historisë. Është përballja e parë sezonale dhe risitë janë të shumta, ashtu si dhe pikëpyetjet se cfarë derbi do të jetë. Një derbi i luajtur në sulm për t’u fituar apo me kujdesin për të mos u humbur, do të vendosë fiziciteti, grinta apo taktika, por në futboll rezultatet vendosen nga momenti kulmor i tij, goli dhe duket e vështirë për të përcaktuar se kush do të shënojë. Partizani dhe Tirana mes shumë ndryshimeve këtë herë kanë një emërues të përbashkët, te të dyja skuadrat për momentin mungon lideri i sulmit. Sezonin e kaluar ishin Sukaj dhe Bakaj ata që mbanin përsipër shpresat e tifozëve respektivë. Bëri fatin e të kuqve shkodrani që shënoi në 3 nga 4 derbit e luajtur, me përjashtim të atij të përfunduar pa gola, një garanci e vërtetë për trajnerin, skuadrën dhe tifozët.
Të njëjtin status te Tirana i duhej ta mbante Elis Bakaj i transformuar në një 9 klasike për shkak të nevojave të skuadrës. Sulmi bardheblu varej nga ai, ishte goli i Bakajt ai që coi Tiranën një hap larg një përmbysjeje të bujshme në derbin e fundit sezonal ku të kuqtë barazuan vetëm në momentet e fundit me Filin, ishte përjashtimi i Bakajt me të kuq ai që fundosi përfundimisht Tiranën në derbin paraardhës. Të dy nuk janë më në kryeqytet, Sukaj bën fatin e tij në Malajzi, ndërsa Elisi në Kroaci dhe në këtë derbi është e vështirë të thuash se kush udhëheq në sulm, pasi te të dyja skuadrat nuk ka një lider të mirëfilltë.
Te Partizani shpresojnë që ta gjejnë te Ekuban, i zhbllokuar më në fund ndaj Teutës, por të gjithë e dinë se vetëm një lule nuk e sjell pranverën. Te Tirana shpresojnë te prurjet e reja nga afrika, që ende mbeten një bast për tu fituar. Derbit të radhës i mungon një lider në sulm, por kush më mirë se kjo ndeshje mund t’i japë një sulmuesi këtë status? Një gol në derbi peshon gjithmonë më tepër!