Një 90 minutësh për ti dhënë një shkelm krizës. Në Zeqir Ymeri këtë të dielë për takimin e radhës nuk luan si zakonisht një pretendent për titullin, Kukësi, skuadra e shtëpisë, por dy skuadrat e fundit të tabelës së klasifikimit. Korabi dhe Teuta përballen të dyja me një synim, për të parë pakëz dritë në fund të tunelit, të dyja vijnë nga një periudhë e errët dhe për të dy skuadrat kundërshtari i radhës përfaqëson mundësinë për të gjetur kthesën e shumëpritur. Në kampin dibran trajneri Haxhiu ende nuk ka gjetur fitoren e parë dhe ajo cka u pa e mirë ndaj Luftëtarit u shkërmoq shpejt në Shkodër ku disfata 3-0 ndaj Vllaznisë forcoi bindjen se misioni i mbijetesës është shumë i vështirë për Korabin që mbetet skuadra më e rrezikuar për rënien nga Kategoria. Trajneri paralajmëroi masa dhe mbetet për tu parë nëse skuadra e ka marrë mesazhin.
Rastësi apo jo, fitoren e vetme në këtë kampionat Korabi e ka siguruar pikërisht ndaj Teutës, një 2-3 emocionues në Durrës, ishte një ndeshje e mbarë për Plakun dhe Nexhipin, që këtë sezon e kanë vuajtur mungesën e fatit, ndërkohë që pati edhe dy kartona të kuq, për Shetën dhe Lamcen që tanimë nuk është më pjesë e Teutës, ndërkohë që edhe mbrojtësi i Korabit do të mungojë pasi është i skualifikuar. Bregdetarët vijnë pas 4 humbjeve radhazi që padyshim kanë ndikimin e tyre në ambientin e skuadrës durrsake, aty ku Magani po has vështirësi për të gjetur kthesën e domosdoshme. Teuta të paktën një gol për ndeshje po e shënon, por edhe pëson shumë dhe trajnerit për të gjetur sërish rrugën që sezonin e kaluar e coi në Europë i duhet që së pari të blindojë mbrojtjen. Në Zeqir Ymeri Korabi dhe Teuta vijnë me një mision të përbashkët, për ti dhënë një shkelm krizës.