Pep Guardiola nuk do të mund të llogarisë në tre futbollistë për ndeshjet e ardhshme.
Federata e Futbollit të Anglisë ka konfirmuar që treshja e Manchester Cityt, Sergio Aguero, Fernandinho dhe Nicolas Otamendi janë të dënuar me nga katër, tri, përkatësisht një ndeshje.
Aguero do të mungojë në katër sfidat e ardhshme pas kartonit të kuq të marrë ndaj Chelseat të shtunën, pas një ndërhyrjeje të ashpër në David Luizin në çastet e fundit të ndeshjes e cila u mbyll me rezultat 3:1 në të mirë të londinezëve.
Kësisoj argjentinasi do të mungojë në ndeshjet e ardhshme përballë Leicester Cityt, Watfordit, Arsenalit dhe Hull Cityt.
Me tri ndeshje është dënuar mesfushori Fernandinho i cili ka pasur një zënkë me Cesc Fabregas dhe për këtë është përjashtuar në çastet e fundit të këtij takimi.
Në fund vjen Otamendi i cili do të mungojë në një ndeshje pasi që ka marrë kartonin e pestë të verdhë këtë stinor. Mbrojtësi argjentinas do të mungojë në ndeshjen e ardhshme përballë kampionëve të Leicester.
