Barcelona ka njoftuar për lëndimin e Sergio Busquets.
Barcelona merr frymë lirshëm, pas testeve që i janë bërë Sergio Busquets. Mesfushori i blaugranave do të mungojë nga 10 deri 15 ditë pas lëndimit që pësoi në sfidën me Eibarin të fituar 4:0 nga skuadra e Luis Enriques.
Ekzaminimet mjekësore të kryera të hënën treguan se 28-vjeçari ka thjesht një përdredhje të ligamentin e jashtëm të kaviljes, duke përjashtuar mundësinë e këputjes, gjë të cilës i janë frikësuar të gjithë te Barcelona.
Pas një ndërhyrje të ashpër të Gonzalo Escalante, mesfushori i Barcelonës kishte mbetur i lënduar, ku ndonëse kishte provuar të luante e kishte të pamundur një gjë të tillë.
Kësisoj Busquets do të mungojë në ndeshjen e kthimit të çerekfinaleve të Kupës së Mbretit ndaj Real Sociedad, si dhe në dy takimet e La Ligës, përballë Real Betis dhe Athletic Bilbao.