FIFA ka shprehur sot besimin në kapacitetet e Rusisë për zgjidhjen e problemeve teknike lidhur me vonesat në përurimin e stadiumit të Saint-Petersbourg, ku do të luhen ndeshjet e Kupës së Konfederatave 2017 dhe të Botërorit 2018.
“Ka një plan të qartë, një planifikim teknik të punimeve që priten të bëhen efektive në dy javët e ardhshme”, deklaroi Colin Smith, drejtor i kompeticionit të FIFA-s.
“Ne kemi besim se masat që do të merren do të zgjidhin shume shpejt situatën”, theksoi ai pas një vizite teknike të FIFA-s në Saint-Petersbourg.
Pas 10 vjet punimesh, stadiumi i ri kishte testin e parë në fillim të shkurtit, duke pritur 10.000 persona në tribunat me kapacitet prej 68.000 vendesh.
Veç ndeshjeve të Botërorit 2018, stadiumi “Saint-Petersbourg Arena” do të presë shumë ndeshje të Kupës së Konfederatave 2017, përfshirë dhe finalen.
