Një ditë pas përballjes Itali-Shqipëri, të vlefshme për Botërorin Rusi 2018, janë zbardhur arsyet që i shtynë tifozët shqiptarë që të hedhin flakadanë dhe tymuese në fushën e lojës.
Burime pranë grupimit Tifozët Kuq e Zi thonë se flakadanët u hodhën në shenjë proteste ndaj Federatës Shqiptare të Futbollit, sepse në ndeshjet brenda vendit nuk i ka lejuar tifozët të futen me flamuj dhe simbole të tjera, si dhe u kanë ushtruar kontroll tej mase të fortë, të cilin tifozët e cilësojnë si presion.
Flakadanët dhe tymueset u hodhën në një moment kur të besuarit e De Biazit po luanin mirë dhe kishin krijuar disa kundërsulme të rrezikshme në zonën kundërshtare. Pas ndërprerjes së ndeshjes nga gjyqtari slloven lajmi u përhap në mediat kryesore italiane dhe ato ndërkombëtare.
E gjithë situata ishte disi befasuese për vet faktin që tifozët kuq e zi lanë një imazh mjaft të mirë në Europianin e Francës.