Ai ishte njeriu që hapi rrugën kualifikimit historik të Shqipërisë në Europianin francez falë atij goli fantastik në Aveiro, por jo vetëm aq sepse Bekim Balaj ishte gjithashtu njeriu që i dha fitoren e parë Shqipërisë në kualfikueset e Botërorit Rusi 2018-të me atë gol në fund ndaj Maqedonisë, ndërsa gjeti rrugën e rrjetës edhe në suksesin 0-2 ndaj Lihtenshtejnit. Sa herë që i jepet mundësia për të zbritur në fushë 26-vjecari shkodran jep maksimumin për Shpipërinë. Për fatin e tij të keq trajneri De Biasi nuk i dha asnjë minutë në ndeshjen e Palermos ndaj Italisë. Keqardhja është e madhe për Balajn që gjithsesi sheh me optimizëm nga ndeshja e radhës që është miqësorja ndaj Bosnje Hercegovinës.
“Në cdo ndeshje të kombëtares dëshira është për të luajtur. Bëhej fjalë për një sfidë të madhe, ndaj Italisë dhe dëshira ishte e madhe për të luajtur pasi përballë kishim futbollist të mëdhenj. Megjithatë ajo ishte zgjedhja e trajnerit dhe unë duhet të mendoj për ndeshjen e radhës, pasi është ai që vendos. Bëmë një ndeshje të mirë ndaj Italisë, normalisht detyra e sulmuesve është të shënojnë. Krijuam raste me Cikalleshin dhe Roshin por nuk arritëm dot te goli. Gjithsesi shohim përpara dhe shpresoj të shënojmë ndaj Bosnjes”.
Sipas sulmuesit të Terek Grozny-it është trajneri ai që vendos se kush duhet të luajë. Balaj nuk mendon se ndalesa e kampionatit rus për disa muaj e ka penalizuar në kombëtare, ndërkohë që kërkon golin ndaj Bosnjes.
” Unë jam në gjëndje të mirë nuk mendoj se ndalesa e kampionatit rus ka ndikuar në uljen time në stol pasi kisha luajtur në 3 ndeshje përpara kësaj sfide, por trajneri bëri zgjedhjet e tij. Shpresoj të luaj ndaj Bosnjes dhe pse jo të shënoj”.
Bomberi 26-vjecari u ndal edhe te largimi i papritur i dy mesfushorëve nga kombëtarja, Taulant Xhakës dhe Amir Abrashit ndërsa foli edhe për objektivat e mbetur në këto eliminatore.
“Nuk e di pse janë larguar, Abrashi dhe Xhaka, atmosfera në skuadër është e mirë, por ata kanë bërë zgjedhjet e tyre.Ndeshjen e rradhës e kemi ndaj Izraelit, duam të grumbullojmë sa më shumë pikë, dhe të bëjmë më të mirën tonë në sfidat e mbetura. Nuk duam ti vëmë objektivat vetes”.
