Dortmundi u kualifikua në finalen e madhe të Kupës së Gjermanisë, pasi që e mposhti me rezultat 3:2 Bayern Munihun, në takimin që u luajt në ‘Allian-Arena’. Trajneri i Dortmundit, Thomas Tuchel, ka përgëzuar futbollistët e tij për fitoren. Ai është krenar për kualifikimin, sidomos për përmbysjen e rezultatit, pasi në një moment ishin duke humbur me 2:1.
“Bëmë një përmbysje të çmendur në Munih” ka thënë Tuchel. Ai mendon se treguan lojë të madhe me përjashtim që në minutat e para bënë disa gabime. “Në 20 minutat e para bëmë shumë gabime duke humbur shumë duele. Më pas me pak fat pas pushimit arritëm të përmirësoheshim dhe më pas shënuam dy gola të mrekullueshëm. Jam shumë i lumtur që arritëm në finalen e kupës në Berlin. Bayern ka një ekip të madh, kështu që të duhet pak fat për t’i mundur. Ky është momenti më i madh i karrierës sime. Nuk do ta harroj këtë mbrëmje”, ka thënë Tuchel. Verdhezinjtë në finale do të ballafaqohen me Eintracht Frankfurtin dhe kanë rastin që të stolisen me trofeun e çmueshëm, Kupën e Gjermanisë.
