Klubi katalanas duket se ka gjetur pasardhësin e Luis Enriques.
Barcelona më në fund ka vendosur për trajnerin e ri. Bëhet fjalë për Ernesto Valverden, trajneri aktual i Athletic Bilbaos.
Ai do të zëvendësojë trajnerin Luis Enrique, duke realizuar ëndrrën e tij për të drejtuar skuadrën e madhe katalanase. Njoftimi zyrtar i Barcelonës pritet të bëhet më 29 maj, vetëm pak orë pas finales së Kupës së Mbretit ndaj Alaves, që njëherësh do të jetë edhe ndeshja e fundit e Enriques në stolin e Barçës.
Mësohet se Valverde tashmë ka njoftuar se do të largohet nga Bilbao, skuadër e cila në vend të tij ka emëruar trajnerin Ziganda. Spanjolli gjatë karrierës së tij si trajner ka drejtuar skuadrat si Espanyol, Olympiacos, Villarreal dhe Valencia.
