Futbollistët e Eintracht Frankfurt të shtunën do të luajnë kundër Borussia Dortmund për trofeun e Kupës së Gjermanisë dhe duket se në ekip ka edhe të atillë që nuk ndajnë deri në fund entuziazmin e përbashkët në prag të sfidës së ardhshme.
Në fakt, uruguaiani Guillermo Varela, i huazuar nga Manchester United, nuk ka dëgjuar instruksionet e trajnerit që të mos bëjë tatuazh, gjë e cila i ka kushtuar shtrenjtë pasi që njëra nga tatuazhet i është infektuar.
“Në kundërshtim me instruksionet e trajnerit Niko Kovaç, Varela të hënën ka bërë tatuazh dhe ajo i është infektuar”, thuhet në kumtesën e klubit.
Edhe drejtori i klubit, Fredi Bobiq tha se Varela ka kërcënuar interesat e ekipit dhe tash duhet të mendojë mirë nëse do t’i ofrojnë uruguaianit qëndrimin në Eintracht. Ndryshe, Varela këtë sezon ka luajtur vetëm gjashtë ndeshje, kryesisht për shkak të lëndimit.