Skuadra e Shkëndijes nga Tetova është kualifikuar në rrethin e tretë të Europe League. Kuqezinjtë barazuan në udhëtim me rezultat 1:1 me skuadrën finlandeze, HJK Helsinki, kësisoj u kualifikuan falë fitores në takimin e parë me 3:1. Tetovarët me rezultat të përgjithshëm 4:2 eliminuan Helsinkin. Skuadra shqiptare tregoi paraqitje mjaft të mirë dhe u shpërblye me kualifikim. Në minutën e 28-të, Marjan Radeski shënoi autogol për epërsinë e skuadrës finlandeze.
Megjithatë, Shkëndija luftoi ashtu si i ka hije, nuk u dorëzua për asnjë çast dhe barazoi rezultatin 19 minuta pa përfunduar ballafaqimi. Në minutën e 71-të, kapiteni Ferhan Hasani asistoi, ndërsa Ivan Çelikoviç realizoi për 1:1, duke sjellë gëzim të madh në mesin e kuqezinjve dhe në anën tjetër zhgënjim i madh te vendasit. Mi të gjitha u zhvillua një lojë mjaft e mirë nga të dyja palët, ndërsa djelmoshat e trajnerit Qatip Osmani realizuan qëllimin e tyre, kualifikimin në rrethin tjetër. Synimi i Shkëndijes është që të kualifikohen në fazën e grupeve dhe gjasat i ka mjaft të mira nëse vazhdon me këtë ritëm të lojërave të mira.
Helsinki-Shkëndija 1:1
Stadiumi: “Telia 5G-Areena” në Helsinki.
Gjyqtar: G. Jarl Jonsson. (Islanda).
Shënues: Radeski (autogol) – Çelikoviç (71’).
Kartonat e verdhë: Onovo, Jalasto-Zahov.
HJK Helsinki: Dahne, Rafinha, Jalasto, Obilor, Pirinen, Yaghoubi (Dahlstrom 79’), Annan, Onovo, Savage, Jallow (Valencic 64’) dhe Pelvas (Mensah 74’).
Shkëndija: Zahov, Todorovski, Bejtullai, Cuculi, Çelikoviç, Alimi, Vujçiç (Bojku 79’), Radeski (Teqja 90+4'), Hasani, Abdurahimi (Totre 66’) dhe Ibraimi.