Mbrojtësi i Skënderbeut, Bajram Jashanica, do të qëndrojë vetëm dy javë jashtë fushave. Kjo është përgjigja e rezonancës që ka marrë ditën e djeshme lojtari kosovar. Në orët e paradites së të hënës, ai u paraqit në një prej spitaleve të kryeqytetit, duke kryer rezonancën në pjesën e shpatullës. Dy ditë më parë mbrojtësi u dëmtua pas një përplasjeje me sulmuesin e Vllaznisë, Atsina.
Fillimisht u mendua se kishte nxjerrë shpatullën, por mjekët dje e kanë qetësuar lojtarin dhe stafin e Skënderbeut. Mësohet se ka rezultuar vetëm një shembje dhe jo thyerje të klavikulës, ashtu si edhe dyshohej në momentin e parë. Por, rezonanca është ajo që tregon gjithçka, dhe dje, pasi e ka kryer në kryeqytet, përgjigja duhet thënë se ka qenë pozitive, pasi e rëndësishme është që Jashanica nuk ka thyerje.
Vetëm dy javë mungesë është një lajm i mirë dhe mbrojtësi humbet në këtë mënyrë dy ndeshjet e radhës në kampionat, atë ndaj Flamurtarit në Vlorë dhe me Kamzën në Korçë. Jashanica shpresohet të jetë gati ndaj Dinamos së Kievit në ndeshjen e pestë të grupit B të Ligës së Europës, por gjasat janë të pakta. Ky takim është planifikuar të luhet më datën 23 nëntor në “Elbasan Arena”, teksa do të zhvillohet me dyer të mbyllura.