Blerim Xhemaili kthehet te Bologna pas 7 muajsh. Mesfushori me origjinë shqiptare që luan për kombëtaren e Zvicrës do të jetë sërish pjesë e Serisë A. Xhemaili ka zyrtarizuar largimin nga skuadra e Montreal Impact që merr pjesë në MLS (kampionati i futbollit në SHBA).
Edhe vetë trajneri i Montreal, Remy Garde ka lajmëruar se mesfushori nuk do të jetë më pjesë e skuadrës që ai drejton.
“Na ka kërkuar largimin për arsye familjare dhe sportive. Nuk dëshirojmë të mbajmë në ekip një futbollist që nuk është i bindur për të qëndruar”, tha trajneri Garde. Xhemaili u largua nga Bologna në maj të 2017-ës për të luajtur për ekipin kanadez të Montreal, por tashmë pas 7 muajsh ai do të rikthehet në Serinë A.
Kujtojmë se pak javë më parë ai është ndarë edhe nga bashkëshortja, pikërisht shqiptarja Erjona Sulejmani.