Mahrez do të vazhdojë të japë gjithçka nga vetja për Leicesterin, pavarësisht asaj që ndodhi në afatin kalimtar të janarit.
Anësori i Leicester Cityt, Riyad Mahrez, është rikthyer në stërvitje për herë të parë qëkur dështoi transferimi te Manchester City në afatin kalimtar të janarit.
26-vjeçari nuk është stërvitur me bashkëlojtarët që kur Leicesteri e refuzoi ofertën prej rreth 62 milionë euro nga lideri i Premierligës në ditën e fundit të afatit kalimtar të janarit.
“Në 10 ditët e fundit shumë njerëz që pretendojnë se janë shokë të mi kanë folur për mua, për gjëra që ata nuk i dinë”, tha Mahrez.
“Kam qenë pjesë e Leicester City në arritjen e shumë sukseseve që nga promovimi në Premierligë e deri te titulli i kampionit”.
“Synimi im ka qenë gjithmonë i njëjtë, të jap 100 kurdo që luaj për klubin, për shokët e skuadrës dhe për tifozët. Këto synimi mbesin të njëjta edhe sot dhe do të vazhdojnë të jenë derisa të jem pjesë e këtij ekipi”, theksoi mes tjerash Mahrez.